Порошволь (Кӧсладор район)
Порошво́ль (рочӧнжык По́рошова) — Перем ладорись Коми кытшын, Кӧсладор районісь Кӧс посадмуын грезд (деревня), кӧть мукöдыс шуӧны сійӧ и посадӧн.
| Порошволь Порошева | |
| Му: | Рочму |
| Статус: | грезд |
| ладор: | Перем ладор |
| район: | Кӧсладор район |
| Инлыдпассэс: | 60°07′13″ с. ш. 54°53′12″ в. д.HGЯO |
| Веськӧтлан кыв | роч, коми |
| Отир лыд | 122 морт (2009) |
| Час кытш: | UTC+5 |
| Телефон нумерӧ содтӧт: | +7 34298 |
| Почта инпас: | 619435 |
| Авто нумерӧ содтӧт: | 59 |
Порошволь куйлӧ Кӧс посадсянь ойвыв-рытвылӧ 20 км ылынаын, Сым ю дорсянь лунвылӧ ӧтік километра ылынаын, Пятигорланьӧ мунтӧн автотуйсянь веськыт ки вылас, ыббез коласын.
Кӧркӧ татӧн вӧлі Порошволь сельсоветлӧн шӧрин.
Ним йылісь
вильмӧтныТалуння отирыс шуӧны да, Порошовасӧ пондӧмась сідз шуны роч пороша 'усян лым, падера' кывсянь. Важынся Порошволь нимсӧ талун етша кин и тӧдӧ, коть А. С. Кривощёкова-Гантман дырни важ отир кужӧмась эшӧ висьтавны веськыт этимология: Порош воль — Порош нима мортлӧн воль (ректас). [1]
Ордча грезддэз
вильмӧтныПорошволь дынсянь медматын олан пункт — Несӧль грезд, кӧда сулалӧ Порошвольсянь лунвыв-рытвылӧ ӧтік километра ылынаын (автотуй кузяс сэтчӧ муннытӧ 1,5 км — автобус сувтчанінсянь медодз ойвылӧ, сэсся кежны шульга ки вылӧ). Кыкнан деревня коласын куйлӧ ӧтласа шойна. Сійӧн, мыля Несӧляс не садик, не школа, не магазин, не почта, не мый абу, несӧлёвчиыс вовлӧны пыр Порошвольӧ.
Лунвыв-асыввылас трасса кузя куим километра ылынаын сулалӧ Маскаль деревня. Ойвылас медматын грезд, Дасморт (ӧні йӧзтом ни), сизим километра ылынаын. Асыввылас ӧддьӧн ни ылын — Солым.
Вӧрынжык, лунвыв-рытвылас, кӧркӧ вӧлӧмась сэтшӧм учӧтик грезддэз, кыдз Новосёл (30 км ылынаын) да Собачка (35 км ылынаын). Сэтӧн олӧмась сваль роччез, кӧдна ӧні вуджисӧ Порошвольӧ.
История
вильмӧтныЯнсалӧм
вильмӧтныГрезд шӧрӧттяс мунӧ ыджыт кырас: асыввылас сысянь куйлӧ Мыс, кӧдӧ унажыксӧ лыддьӧны торья грездӧн, рытвывланьын – ачыс Порошвольыс.
Уличаэз
вильмӧтныГрездын эм то кытшӧм уличаэз:
- Мир туй (Мысын)
- Октяб 25 лун нима туй (Мысын)
- Коммунаррез туй (Порошвольын)
- Пионер туй (Порошвольын)
- Пионер туйколас (Порошвольын)
- Томпӧлӧс туй (Порошвольын)
Медыджыт туй грездас мунӧ автотрассасянь ойвывланьӧ, параллель нёжӧн кырасыскӧт, рытвылӧттяс. Медодзза туйвежын — площадь кодь мыйкӧ.
Веськӧтлан
вильмӧтныОдзжык сельсовет администрацияын пукалӧмась 3 морт. Ӧні ӧтік морт баитӧ отирыскӧт влась нимсянь. Эм милицияись участковӧй. Уджалӧ почта юкӧт № 619435.
Отир
вильмӧтныОлӧны Порошволяс 122 морт (2009 во пондӧтчан кежӧ), видзӧны 40 горт. Отирыс шусьӧны порошо́вчи.
Медодз грездас олӧмась чисто комиэз. Сэсся, война коста, татчӧ локтӧмась роччез, этасянь талун порошовчи коласын эмӧсь и комиэз, и роччез. Унажыкыс сё жӧ комиэз. Школаын быдӧнныс кывзӧны коми кыв сьӧрті уроккез. Но мунӧ сёрни коми кывсӧ школаись вӧтлӧм йылісь.
Памиллёэз коласын медуна пантасьӧны Щербаковвез, Останиннэз, Жижилеввез.
Религия сьӧрті отирыс веськыткылаӧсь (православнӧйӧсь). Мыля часовенка грездын пӧдналӧм, отирыс ветлӧны юрбытны Кудымкарӧ нето Кӧс посадӧ.
Экономика
вильмӧтныКӧркӧ Порошвольын вӧлі колхоз. Ӧні колхоз местӧ осьтӧмась пилорама. Вӧрсӧ пӧрӧтӧны унажыксӧ вовліссез (лунвывся отир). Мукӧдыс порошовчи коласісь уджалӧны ны бердын. Асьныс оліссез пӧрӧтӧны жӧ вӧр, керӧны сруббез да вузалӧны Кыдзкарланьын.
Керкуэз быдӧнныс керӧмӧсь пуись. Эмӧсь кык патераа керкуэз да торья гоз понда керкуэз.
Грездын эм куим магазин, ӧтікыс сельпо, а кыкыс частнӧйӧсь.
Йӧзӧс кыскалӧ автобус Кӧс—Пятигор (ветлӧтӧ вильлунӧ да петничаӧ). Эм тодильнӧй сувтчанін. Озыржык порошовчилӧн эмӧсь ас автомобиллез, кынымкӧ трактор. Туйез вевттьӧмӧсь кӧдзаӧн нето щебёнкаӧн.
Отирыс уна вӧралӧны. Угоддёэз эмӧсь Собачка ладорын. Кыйлӧны кӧччезӧс, таррезӧс, сьӧлаӧс (дзугӧн). Ошшезӧc озо кыйӧ, мыля мӧссэзӧс нія вийлӧны шоча. А кӧиннэзкӧт бура пессьӧны, лёка пода джагӧтӧны да.
Культура
вильмӧтныПорошвольын эм нетыр шӧрӧт школа, кӧдалӧн важ керкуыс сулалӧма 1925-28 (?) восянь. 12 км сайсянь ордча грезддэзісь челядьыс вовлӧны татчӧ велӧтчыны.
Кӧркӧ грездын вӧлі приют (Кӧсладорын сэтшӧмыс нач ӧтік и вӧлӧма). Сэсся приютсӧ пӧдналӧмась, а сы керкуӧ меститӧмась школа.
Порошволяс эм кык библиотека (посад понда да школа понда), ДК клуб (сельскӧй библиотекаыс сэтчин). Школаын осьтӧм музей.
Эм и фельдшера-акушера пункт.
Вежалуннэзісь медбура порйӧтӧны масленича: март коста быдӧс район понда лӧсьӧтӧны гажсӧ, кӧть и не быд год.
Сьылісь чукӧрӧн быдкодь фестиваллез вылӧ, Кӧсӧ да кытчӧ да, сьывнытӧ ветлӧны велӧтіссез.
Спорт
вильмӧтныПорошвольын эмӧсь площадкаэз футболӧн да волейболӧн орсӧм могись. Ордчӧн, ДК клубын уджалӧ спортзал (волейбол, баскетбол да теннис). Кӧсладор чемпионатын волейбол сьӧрті порошовчи неӧтпыр вермывлісӧ. Быд во гожумнас томпӧлӧс лун кежӧ Порошвольӧ вовлӧны пятигорчи орсны волейболӧн да футболӧн.
Сингажӧтаннэз
вильмӧтны- Стелла войнаын усьӧм земляккезлӧ (2010 тулыснас осьтӧм) — быдӧс ордча деревняэз понда вежаин.
- Часовенка
Гора нима отир
вильмӧтныОрдча ландшафттэз
вильмӧтны- Шаминскӧй лог — олӧмась пӧ сэтчин шаманнэз, дзебӧмась зарнисӧ да пышшӧмась, отирыс ӧнӧдз тай кошшисьӧны.
- Макарпальник (Несӧль дынынжык)
- Кашпальник (Несӧль дынынжык)
Ыстісяннэз
вильмӧтны- ↑ Труды института языка, истории и традиционной культуры коми-пермяцкого народа. Выпуск 4. = Кривощекова-Гантман, А. С. Собрание сочинений в 2 томах. Т. 2. Ономастика. Пермь, 2006. Лб. 178.
Ӧшмӧссэз
вильмӧтны- География Коми-Пермяцкого автономного округа. Пермь, 1992. ISBN 5-7625-0162-0.
- Коми-Пермяцкий автономный округ на рубеже веков. Кудымкар, 2000. ISBN 5-87901-051-1
- Мартынов М. Е. Селения Косинского района. Справочно-статистический материал. Кудымкар, 2009. ISBN 978-5-87901-127-2
- Шаги времени. К 80-летию образования Косинского района / редактор-составитель О. П. Кучева. Пермь, 2004. ISBN 5-93683-030-X.
- Щербакова О. А. Висьтасьӧм. Перем, 2010.