Поддячӧв (Кӧсладор район)

Поддя́чӧв — Перем ладорись Коми кытшын, Кӧсладор районісь Чадзӧв посадмуын грезд (деревня).

Поддячӧв Подьячево
Му:	Рочму
Статус:	грезд
ладор:	Перем ладор
район:	Кӧсладор район
Инлыдпассэс:	59°53′13″ с. ш. 54°30′59″ в. д.
Веськӧтлан кыв	коми, роч
Отир лыд	161 морт (2009)
Час кытш:	UTC+5+5
Телефон нумерӧ содтӧт:	+7 34298
Почта инпас:	619451
Авто нумерӧ содтӧт:	59, 81

Ним йылісь

Файл:Чадзöвсянь урдöл5.JPG

Поддячöв грезд

Файл:Поддячöвö пыран.JPG

Юксьöв ладорсянь Поддячöвö пыран

Файл:Поддячöвись часовенка.JPG

Пролавер часовенка

Файл:Поддячöвись мöссэз.JPG

Мöссэз туй вылын

Файл:Поддячöв Ыджыт туй.JPG

Ыджыт туй

Файл:Поддячöв лавка.JPG

Костарева лавка

Файл:Поддячöв кöсöгöр.JPG

Поддячöвись петан: Кöсöгöр

Файл:Чадзöвсянь урдол1.JPG

Вердöлсянь дзарньöв

Поддячöвсö татöн оліссез шуöны эшö Подячöв. Этимология сьöрті натьтö перво вöлі Подъя чой.

География

Поддячӧв сулалö Юксьöв—Кöс туй пöлöн Кӧс посадсянь рытвылö 27 км ылынаын (автобусöн кö мунны, петö 28 км, локтан 30 минутаöн) да Кӧч посадсянь ойвыв-асыввылö 33 км ылынаын (веськыт туй кузя).

Поддячöв бердын топ асыввылас, чой йылын, сулалö Чадзöв грезд, посадмулöн шöрин. Татіссез шуöны, Поддячöвыс пö сулалö урдöлын, Чадзöвыс вердöлын. Мед шедны Поддячовсянь Чадзöвö, колö кайны Кöсöгöр.

Местаыс осьтöм, öтмöдöрас паськыт видззез, кöдна одзжык вöлöмась ыббезöн.

Лунвыв-асыввылас, 3,5 км ылынаын сулалö йöзтöм Красинькöв грезд, ойвыв-рытвылас вит километра ылынаын поздісьöма кытчöдз отира Карчой да квать километра ылынаын Пеклаыб. Мунан кö рытвылö тракт кузя сизим километра, петö Пармайыл, 11,6 км кö мунан, петö Юксьöв, кöдна кыкнанныс Кöчладор районын ни.

Поддячöвсянь лунвывті котöртö Кыдзыс ю. Рытвывті километра етш ылынаын кывтö Кыдзыслöн шульга вож Яйва́.

Яйва вожсянь кык километра етш рытвылас вöлi Крычкан шор (вож), кöда öнi косьмис.

Асыввылас эмöсь эшö ю Нюрви́с.

Кыдзыс вылын Поддячöв весьтын, Яйва уссёланьын эм Короса́ыб пруд да Пуста пруд. Лунвывлань кык километра сьöртi эм Капран пруд.

Поддячöвсянь километра етш рыт вылö вöлi Яйва пруд.

Поддячöв дынын эмöсь нюррез:

• Кушню́р (Поддячöвсянь ойвылын)
• Öзы́ннюр (Поддячöвсянь асыввылын)
• Моро́шканюр
• Ӧ́льöннюр
• Тыла́дынюр
• Крычканнюр (Поддячовсянь рытвылын)

Матісь видззез:

• Ыджытви́дз
• Юртöм
• Гунайӧ́р

Поддячöвчань Карчойöдз мунöны ыббез:

• Шöлöмпокат
• Кузьмуйöр
• Иллядзиб
• Шöлöм
• Пипуа́ин
• Тете́ра
• Кöккули́га
• Денько́шор
• Карчо́ймыс
• Öнöпреб (Öнöпрей ыб).

Поддячöвсянь Юксьöв посадланьö ыббез:

Кузибрыл, Сьöд нять, Лыа ыб, Торчик, Яйвапос велдöр, Кык Яйва колас, Кузьпоспон, Вöрчой.

Лунлань ыббез:

Мырья пöдиб, Öльöш пöдиб, Яйва сай, Кыдзыскат, Капран, Льöмпуакуш, Сöбöль кулöм, Мыссэз, Губин йöр.

Матісь вöррез:

• Дзуа́мыс
• Пуштӧ́с
• Джынту́й
• Кöлля́мыс (мукöдыс шуöны Колья́мыс)
• Тагья́шормыс
• Изъя́лог

Туйез

Öні Поддячӧвын лыддьöны кык туй :

Коми ним	Роч ним
Вердöл туй	ул. Нагорная
Ыджыт туй	ул. Ленина

Веськöтлан

Ӧні Поддячӧвыс пырӧ Чадзӧв посадмуӧ.

Отир

Татісь йöзыс шусьöны поддя́чöвчи, öтік айка мортöс шуöны поддя́чöвеч, инька мортсö поддя́чöвка, тöдчанним поддя́чöвскöй нето поддя́чöвись.

Гумагаэз сьöрті 2009' во пондöтчикö Поддячӧвын олöмась 161 морт, кöдна видзöмась 52 горт.

Отирыс комиöсь, баитöны комиöн.

Медваж памиллёыс — Мартынов.

Кöзяйство да быт

Экономика ладорсянь Поддячöвсö колö видзöтны öтлаын ордча Чадзöвыскöт.

Деревняын эм кынымкö асторья уджаин.

• ООО «Чадзöвскöй» (важ совхозлöн коляс, куим мöс видзиссез, шуöны отирын
• Вöрпилитаннэз вита (ИП Варганов,...)

Йöзыс быдтöны мöссэз, вöввез, баляэз, порссез, нимöввез, курöггез.

Мусö озö ни гöрö.

Вöралісь эм быд керкуын. Мед вöравнытö, колö «Удачнöй» вöркöзяйстволісь ньöбны лэдзöг.

Туйез Поддячöвас быдкодьöсь, Ыджыт туйыс гравия. Сы кузя ветлöтöны машинаэз Юксьöв да Кöс коласын.

Уна отирлöн эм ас автомобиль.

Матісь Чадзöвын эм автобус сувтчан, автобусыс Поддячöв пырйöт мунö кыкись ойлуннас:

• Перем ладорö — 00:30
• Кöс ладорö — 10:00

Этася Чадзöвись школалöн ПАЗ ветлö куим маршрут кузя:

• шöрлунö: Чадзöв—Сосновка—Кöс
• ?: Чадзöв—Бачманöв—Кöс
• витöдзлунö: Чадзöв—Кöс

Поддячöвчи видзöтöны телевизор, а радио орöтöмась. Позьö йитчыны телефон пыр, но линия важмöм. Эм таксофоннэз, но карточкаэзöн öнджакерны отирыс абу на велалöмась.

Мобильник кутö öті-мöділаын (UTEL).

Пöддячöвын эм öтік лавка:

• ЧП «Костарева»

Эшö кыка вузасьöны Чадзöвын:

• Кöсісь Райпо
• ЧП «Теремок»

Быт сфера абу зорöтöм, шырсьыны да мый да ветлöны Кöсöдз.

Не шöрись шонтан, не вавайöтан, не канализация Поддячöв грездын абуöсь.

Эм ФАП, медматын больнича Кöсын.

Шойнаыс куйлö ордча Чадзöвсяняс лунвыв-асыввылö 1,5 км ылынаын. Поддячöвчиыс сэтчин жö дзебсьöны, чадзöвчи, пеклаыбчи да карчойчи моз.

Велöтан

• Дöсвелöтан под школа (45 велöтчись) сулалö ордча Чадзöвын.
• Челядьсад (20 кага) да пондöтчан школа (20 велöтчись), кöдна позйисьöны öтік керкуын Чадзöвын жö, сэтчин жö школаись верданін. 2011/12 велöтчан во кежö абуöсь челядь 1' класс понда.

Культура

Клубыс вердöлын, Чадзöвын, сэтчин чулöтлöны быдкодь вежалуннэз. Клубын эм библиотека, клуб бердас площадка (стадион).

Поддячöвын сулалö часовенка Пролавер, гажöн чулöтöны пролавер лун.

Отирыс порйöтöны и мöдік вичкуся празьниккез, шуам, стречалун, кöдö татöн шуöны трӧ́ича.

Посадлуннысö поддячöвчи озö на чулöтö.

Казьмöтаннэз да сингажöтаннэз

• Пролавер часовенка. Одзжык татöн вöлі дюттян, лöсьöтлöмась гулянкаэз, орслöмась лаптаöн да мыйöн да.

Мемориаллэз не казьмöтаннэз Поддячöвын абуöсь.

Берся

Чадзöв да Поддячöв öні позьö öтік грездöн ни лыддьыны, кöть одзжык нія пыр öтамöдныскöт вермасьöмась, быдыс ыджытжыкö бы вöлі пуксьö. Кöркö Поддячöвын олöмась унажык отирыс, а öні токö 1/3 олöны урдöлын, а 2/3-ыс вердöлын. Да и сельсоветлöн керкуыс уна дасво сьöрна абу чой йылас сулалöма...

Лыддьöтан

• Коми-Пермяцкий автономный округ на рубеже веков. Кудымкар, 2000. ISBN 5-87901-051-1
• Коми-Пермяцкий национальный округ. Москва-Ленинград, 1948.
• Мартынов М. Е. Селения Косинского района. Справочно-статистический материал. Кудымкар, 2009. ISBN 978-5-87901-127-2
• Шаги времени. К 80-летию образования Косинского района / редактор-составитель О. П. Кучева. Пермь, 2004. ISBN 5-93683-030-X.