Печора район

Печора район (роч. Район Печора) — веськӧтлан юкӧт Коми Республикаын; республикалӧн 15 районісь ӧтік.

Печора район Коми Республикаын

Веськӧтлан шӧрин – Печора карын. Печорасяняс Сыктывкарӧдз 588 км ылына.

Районыс аркмӧтӧм 1941 годӧ. Медодз (1959 воӧдз) шусис Кожва район.

География

Печора районыс 28,9 сюрс км² ыжда. Куйлӧ Коми Республика ойвыв-асыввылын. Межаасьӧ Вуктыл да Сӧснагорт районнэзкӧт лунвылын, Изьва районкӧт рытвылын, Ускар каркытшкӧт ойвылын, Инта каркытш да Йӧгра кытшкӧт асыввылын.

Климат Печора районас – шӧркодя континентвывся: татӧн овлӧны кузь да лёккодь тӧввез, а гожуммес дженытӧсь да ыркытӧсь. Шӧрӧт шонтӧг лоӧ январ коста −19,3 °C, июль коста +15,4 °C. Год сьӧрна шӧрӧт шонтӧгсӧ лыддьӧны −2,5 °C. Енӧжваыс ӧтік во сьӧрна усьлӧ 580 мм мымдаӧн.

Медыджыт юэз районас – Печора да сылӧн вож Кожва. Мӧдік кузькодь юэз: Лыжа, Луза, Изъяю, Ыджыт да Учӧт Сыняэз, Вангыр, Вяткина.

Колана шедтассэз: мусир, лыа, кӧдза, лыа-кӧдза сорас, извесняк, кирпич сёй, арргиллиттэз да суглиноккез кирпич аркмӧтӧм понда. Клямшор гӧгӧрись (Печора шульга ладорын) аддзисӧ муувтся дубыт ваэзлісь ыджыт куйланін.

Вӧрыс Печора районас – ойвыв парма, унажыксӧ лысъя пуэза.

Районын куйлӧ «Югыд ва» нима националь парклӧн тор. Эм кынымкӧ нюрвывся заказник, кытӧн видзӧны дубваэз, кайезлісь поздісяннэз, туримоль да мырпом быдманіннэз. Ихтиология сьӧрті заказниккез лӧсьӧтӧмӧсь Сыня да Печора юэзӧ, татӧн дорйӧны дона черилісь олан да кульманіннэз (ком, нельма, чими)

Печора карсянь 13 км ылынаын Каменка ю дорын эм геология сьӧрті ассяма казьмӧтан: важ породаэзлӧн петанін. Местаыс ӧддьӧн гажа да кыскӧ дынас туристтэзӧс, сы понда сійӧ нельки шуӧны Печора дорись Альпаэзӧн.

История

1936 февраль 25 лунӧ Коми асвеськӧтлан ладорын вӧлі аркмӧтӧм Печора кытш, шӧриныс – Усвавомын.

1941 март 11 лунӧ РСФСР-ись Медвылын Советлӧн Президиум аслас указӧн лӧсьӧтӧ Кожва район, шӧриныс – Кожвавомын.

1943 нояб 26 лунӧ Кожва районсянь янсӧтӧны Вӧркута да сы бердісь муэсӧ.

1949 январ 18 лунӧ посёлоккез Канин да Печора ӧтлаӧтӧмӧн вӧлі лӧсьӧтӧма Печора кар, кытчӧ сія жӧ годӧ март 1 лунӧ вуджӧтісӧ Кожва районлісь веськӧтлансӧ.

1953 годӧ Кожва районсянь янсӧтӧны Инта район.

1959 апрель 27 лунӧ Кожва район дынӧ ӧтлаӧтӧны вештӧм Усвавом районлісь муэсӧ да ӧтласа веськӧтлан юкӧтыслӧ пуктасӧ ним Печора район, шӧрин – Печора карын.

1975 воын Печора райӧнісь лунвыв муэсӧ ӧтлаӧтны вились аркмӧтӧм Вуктыл район дынӧ, а ойвыв муэсӧ (одзжыкся Усвавом районсӧ) бӧра янсӧтӧны да лӧсьӧтӧны сэтчӧ торья Ускар район.

Отир

Оліссез Печора районас 2010 во пондӧтчан кежӧ 61,1 сюрс морт (Коми Республикаись 6,4 % отирыс). Карын да кароккезын олӧны быдсӧн 51,4 сюрс морт, мӧділаын – 9,7 сюрс морт. 2002 вося гижӧтӧм дырни 68,9 % оліссезісь вӧлісӧ рочӧсь, 15,4 % – комиӧсь, 7,6 % – украинса, 1,9 % – беларуссэз да 1,0 % – тотара.

Веськӧтлӧм

Район вылын юралісьыс – Торлопов Василий Александрович. Веськӧтланыслӧн адрес: 169600, Печора кар, Ленинград туй, 15. Факс (82142) 747-44. Районісь советын медыджыт Ведрицкас Виктор Иозасович.

Янсалӧм

Печора районӧ пырӧны 15 веськӧтлан юкӧт: нёль карму да дасӧтік посадму.

Карму / посадму	Мымда отир (2007)	Кыным оланін	Веськӧтлан	Факс	Юралісь
Берёзовка посадму	449	1	169561, Берёзовка посёлок, Мир туй, 19	(82142) 994-66	Шахтаров Сергей Михайлович
Зеленоборск посадму	646	2	169560, Зеленоборск посёлок, Шӧр туй, 1	(82142) 902-17
Изъяю карму	2315	3	169660, Изъяю карок, Шӧр туй, 7	(82142) 996-32	Зинганшин Виктор Юрьевич
Кедрӧвӧй Шор посадму	690	3	169622, Кедрӧвӧй Шор посёлок, Пошта туй, 9	(82142) 961-23	Касатин Михаил Васильевич
Кожва карму	3300	1	169663, Кожва карок, Мир туй, 12	(82142) 955-22	Зинченко Людмила Анатольевна
Косью посадму	188	1	169655, Косью посёлок, Вӧр туй, 6-5	(82142) 913-82	Платонова Инна Владимировна
Кӧджорӧм посадму	2645	4	169630, Кӧджарӧм посёлок, Вӧр туй, 17а	(82142) 983-68	Журо Любовь Николаевна
Краснӧй Яг посадму	565	2	169665, Краснӧй Яг посёлок, Сӧвет туйкост, 6	(82142) 947-34	Хохлов Константин Юрьевич
Озёрнӧй посадму	731	1	169634, Озёрнӧй посёлок, Шӧр туй, 15	(82142) 942-45	Купцова Наталья Семёновна
Печора карму	46884	1	169600, Печора кар, Ленинград туй, 15	(82142) 746-14	Менников Владимир Евгеньевич
Путееч карму	2355	4	169635, Путееч карок, Паркдор туй, 1	(82142) 932-60	Лобикова Ирина Ивановна
Соколов посадму	498	4	169633, Соколов посад, Шӧр туй, 32	(82142) 992-33	Пастухова Марина Николаевна
Сыня посадму	556	1	169645, Сыня посёлок, Асыввыв туй, 5	(82142) 913-30	Масленникова Людмила Васильевна
Чикшин посадму	747	1	169640, Чикшин посёлок, Шӧр туй, 2	(82142) 901-65	Аршулик Анатолий Васильевич
Яранкурья посадму	737	3	169625, Яранкурья посад, Вӧр туй, 21	(82142) 964-33	Есев Владимир Александрович

Оланіннэз

Печора районын ӧні 32 оланін: ӧтік кар (Печора), куим карок (Кожва, Путееч да Изъяю), 17 посёлок, кык посад (Яранкурья да Соколов) да ӧкмыс грезд.

Коми ним	Роч ним	Статус	Мымда отир (2007)	Пошта индекс	Карму /посадму
Аранеч	Аранец	грезд	70	169600	Яранкурья посадму
Берёзовка	Березовка	посёлок	449	169651	Берёзовка посадму
Бызӧвӧй	Бызовая	грезд	163	169600	Краснӧй Яг посадму
Данилов	Даниловка	грезд	215	169625	Яранкурья посадму
Еджыдъю	Белый-Ю	посёлок	154	169635	Путееч карму
Зеленоборск	Зеленоборск	посёлок	646	169650	Зеленоборск посадму
Изъяю	Изъяю	карок	1635	169660	Изъяю карму
Кӧджорӧм	Каджером	посёлок	1939	169630	Кӧджорӧм посадму
Кедрӧвӧй Шор	Кедровый Шор	посёлок	352	169622	Кедрӧвӧй Шор посадму
Кожва	Кожва	карок	3300	169663	Кожва карму
Кожвавом	Усть-Кожва	грезд	166	169660	Изъяю карму
Конечбор	Конецбор	грезд	222	169600	Кедрӧвӧй Шор посадму
Косью	Косью	посёлок	188	169655	Косью посадму
Краснӧй Яг	Красный Яг	посёлок	402	169665	Краснӧй Яг посадму
Лугӧвӧй	Луговой	посёлок	555	169635	Путееч карму
Медвежскӧй	Медвежская	грезд	116	169600	Кедрӧвӧй Шор посадму
Мишаяг	Миша-Яг	посёлок	391	169600	Путееч карму
Набережнӧй	Набережный	посёлок	514	169660	Изъяю карму
Озёрнӧй	Озерный	посёлок	731	169634	Озёрнӧй посадму
Песчанка	Песчанка	грезд	61	169633	Соколов посадму
Печора	Печора	кар	46884	169600	Печора карму
Причал	Причал	посёлок	156	169630	Кӧджорӧм посадму
Путееч	Путеец	карок	1255	169635	Путееч карму
Родионов	Родионово	грезд	1	169633	Соколов посадму
Рыбница	Рыбница	посёлок	167	169620	Зеленоборск посадму
Соколов	Соколово	посад	414	169633	Соколов посадму
Сыня	Сыня	посёлок	556	169645	Сыня посадму
Талӧй	Талый	посёлок	387	169621	Кӧджорӧм посадму
Трубосьӧдъёль	Трубоседъёль	посёлок	163	169630	Кӧджорӧм посадму
Уляшев	Уляшево	грезд	22	169633	Соколов посадму
Чикшин	Чикшино	посёлок	747	169640	Чикшин посадму
Яранкурья	Приуральское	посад	452	169625	Яранкурья посадму

Экономика

Индустрия

Печора район пырӧ Коми Республикаись куим район коласӧ, кытчӧ мусир да газ шедтан комплекслӧн ӧктӧмӧсь медшӧрӧт выннэз. Районісь мусирсӧ судзӧтӧны 16% быдӧс республика шедтӧм сьӧрті. Татӧн уджалӧны:

• ООО «Лукойл-Коми»
• ООО «Газпром переработка»
• ЗАО «Печоранефтегаз»
• ООО «НК Речер-Коми»
• ООО «Печорскӧй энергетическӧй компания»

Районлісь мупытшксӧ вились пондісӧ туявны геологгез. Мусирсӧ кошшӧны талун лэдзӧг сьӧрті 9 компания:

• ООО «Луидор» (Мӧсква)
• ООО «Венлок-нефть»
• ООО «НК Рената» (Ускар)
• ЗАО «Со-Га-Зо-йл» (Сыктывкар)
• ООО «Лукойл-Коми»
• ООО «Аравак – Геосервис»
• ООО «Коминефтегаз» (Уква)
• ООО «ЮГ-Газэнергоресурс» (Мӧсква)
• ООО «Косью-нефть» (Уква)
• ООО «Косью» (Ускар)

Район му кузя мусир да газ кыскӧм сьӧрті эм нёль ыджыт уджаин:

• ООО «Севернӧй магистральнӧй нефтепроводдэз», кӧдалӧн нёль мусирвӧтлан поз увья (Сыняын, Чикшинын, Кӧджорӧмын да Печораын) тыдалӧмӧн быдмис «Усавом» нима мусирнуан гумыслӧн лэдзан выныс.
• ООО «Газпром трансгаз Ухта»
• Печораись ЛПУ МГ ООО «Газпром трансгаз Ухта»
• «Севернӧй ЛПУ МГ» (сія лоӧ ООО «Газпром переработка»-лӧ филиал).

Ӧні район пырйӧт мӧдӧны лӧсьӧтӧны мусирнуан гум «Ямал – Европа».

Транспорт

Печора район аркмӧм Печора ю да ойвывся кӧрт туй вожасянінын. Нӧббесӧ (груззэсӧ) кыскалӧны кӧрттуй да ю кузя, а сідзжӧ вертолёттэзӧн.

ОАО «Печорскӧй речнӧй порт» уджалӧ маршруттэзын: Печора – Вуктыл, Печора – Изьва, Печора – Ускар, Печора – Нарьянмар. Уджаинылӧн эм этася лэдзӧг (лицензия) видзны кӧдзалісь кык шогманін, кытісь сія шедтӧ да вузалӧ кӧдзасӧ.

Ю кузя нӧббесӧ кыскалӧны сідзжӧ ОАО «СК Печорскӧй речнӧй пароходство» (маршруттэс: Печора – Ускар, Печора – Чилимдін, Печора – Нарьянмар) да ЗАО «ВиД» (нӧббез кыскалан маршрутыс Печора – Нарьянмар да отирӧс нӧбӧтан маршрут Печора – Озёрнӧй – Печора).

Ӧні нюжӧтӧны авто туй Ухта – Печора – Усинск: лӧсьӧтӧмась ни Ыджыд Каменка ю вевдӧрӧт пос, осьтӧмась ветлӧмсӧ кык зумыт пос кузя (Марьёль да Чикшин юэз весьтӧт) . Талун кежӧ помалӧмась федераль туйлісь тор Чикшин да Берёзовка коласын (16,4 км кузя).

Туйез нюжӧтӧны да видзӧны районас

• ООО «Усинскӧй ДРСУ»
• ООО «Искра»
• ООО «ПечораСтройМаш»

Агропромкомплекс

Печора районын эм му-видз уджалӧм сьӧрті дзир 2 уджаин:

• ООО «АгроВиД» (Луговӧй посёлокын) йылӧтӧ сюра пода; лэдзӧ, заптӧ, бурмӧтӧ да вузалӧ му-видз уджалан да подавидзан продуцкция, отир понда быд лун колана товаррез да сёян-юан. Ӧння кадӧ ООО «АгроВиД»-лӧн 300 юр сюра пода, сы коласын 132 йӧла мӧссэз.
• ООО «Межвежскӧй» (Медвежскӧй грездын) лэдзӧ да вузалӧ быдмас дв пода видзан продукция, заптӧ, бурмӧтӧ да вузалӧ пубурсӧ, вӧр продукция, пилитӧмторрез, вӧзйӧ кесйӧттэз (услугаэз) отирлӧ. Кӧзяйстволӧн 70 юр сюра гырись пода, ныись 26 юр мӧссэз.

Энія уджаиннэс тырмӧтӧны йӧвнас Печора карись бюджетвывся сферасӧ (больничаэз, челядь саддэз, школаэз), ӧтлаын чулӧтӧны му-видз уджаліссезлісь ярманкаэз, сетӧны мед отирыслӧ асланыс оланіннэзын.

Район му вылын эм сэсся крессяна-фермеррезлӧн вит кӧзяйство (Краснӧй Яг, Соколов, Яранкурья, Кедровӧй Шор посёлоккезын). Нія йылӧтӧны сюра гырись пода, высьтісьӧны да вузасьӧны йӧлӧн, быдтӧны да вузалӧны картов да мӧдік карч.

Велӧтчан

Печора районын отирӧс велӧтӧм могись уджалӧны 50 артмӧтӧмин (учрежденнё). 24 школаодзся велӧтанінын быдтіссьӧны 3006 посни челядёк (65-ӧс быдтӧны пондӧтчан школа-садын). Эм 12 шӧрӧт школа (ны коласын ӧтік гимназия), нёль под школа, 6 пондӧтчан школа-сад; быдсӧн ныын велӧтчӧны 5678 морт.

Печора карын уджалӧ Челядь понда кужӧттэз (искусствоэз) сьӧрті школа (филиалыс эм Кожваын), кӧдаись 65 кытшоккезын велӧтчӧны 2200 морт.

Печораын медыджыт велӧтчанін – Индустрия-экономика сьӧрті техникум. Татӧн 16 быдкодь уджжезӧ пондӧтчан тшупӧтын да 4 специальнось сьӧрті шӧрӧт тшупӧтын велӧтчӧны сюрсся унажык морт. 2009 годсянь ИЭТ-ӧ осьтӧмась коставлӧмӧн велӧтчан юкӧттэсӧ эшӧ кык специальнось сьӧрті: «керкуэз да мый да вептӧм и видзӧм», «электро поззэз, веззэз да системаэз». Техникумлӧн эм 11 велӧтчан корпус, товарлэдзан ӧння комплекс, сёян лӧсьӧтан цех, кык магазин, «Дебют» нима шырсянін.

Печора карын эм и Ю кузя уйӧтісьӧ велӧтанін. 2006 годсянь сія лоӧ филиал туйӧ Ва коммуникацияэз сьӧрті унивеситетлӧн (Петракар). Этӧ – ыджыт велӧтчанін, кӧда вермӧ лӧсьӧтны бур специалисттэзӧс ю флот понда. Сылӧн ӧння материальнӧй база: паськыт жыррез, бытшӧма лӧсьӧтӧм кабинеттэз, компьютеррезӧн кык класс, лабораторияэз, мастерскӧйез, уйӧтан тренежёррез, тренажёррезӧн зал, лямпаэз видзан база, озыр библиотека, мезей, ӧтуволанін. Велӧтанінсис лэдзӧм отир уйӧтӧны судноэз Рочму 23 бассейнын да му югыт саридзӧт быдкодь паськытаэзын. Сія жӧ велӧтанінас удж сьӧрті содтӧт велӧтчан босьтӧм могись быд во ыждӧтӧ тӧдӧммесӧ да кужӧммесӧ ю транспортын не ӧтік сё уджалісь.

Культура

Карын оліссезлӧн эм «Досуг» нима ӧтувтчӧм, кытӧн 22 гажӧтан коллективӧ пырӧны 293 морт. «Досуг»-ыс под вылын сідз жӧ уджалӧны интерессэз сьӧртьі куим клуб да йӧзколасісь квать котыр.

Карын оліссезлӧн эм и «Центр досуга и кино» нима ӧтувтчӧм, кӧда борд увтын 25 клубчужӧма котыр.

Оланіннэз коласісь «Меридиан» нима ӧтувтчӧм видзӧ 21 филиал Печора районісь быдкодь оланіннэзын.

Печора районісь библиотекаэз ӧтувтан системаӧ пырӧны 22 библиотека: 6 – карись да 16 – район пасьтаись. Аркмӧтӧны виль чужӧма небӧгаиннэз: библиотека-клуб Берёзовкаын (1997) да библиотека-музей Соколовын (2004).

Печораись история сьӧрті асладор музей ӧктӧ, видзӧ да сетӧ тӧдмасьӧм понда отирлӧ важ кадсянь кольччӧм бурсӧ, быдтӧ йӧзын радейтӧм ыджыт да учӧт чужанін дынӧ, саймӧтӧ морттэзлісь асьнысӧ гражданаӧн кылӧмнысӧ.

Кужӧтэз сьӧрті школаын (Печора) эмӧсь юкӧттэз – скрипка, баян, гитара, аккордеон, домра, балалайка, фортепиано, кужӧттэз, театр. Филиаллэс остӧмӧсь Кожваын да Кӧджорӧмын.

Спорт

Печораын эм челядь да томмез понда спорт школа (филиалыс Кожваын), кытчӧ ветлӧны 657 морт. Уджалӧны секцияэз:

• вермасьӧм сьӧрті: мезмыт вермасян, самбо, ки кось;
• лямпаэзӧн орддиссьӧм сьӧрті;
• уялӧм сьӧрті;
• спорт орсаннэз сьӧрті: футбол, волейбол, баскетбол, шахматтэз.

Печораись ДЮСШ видзӧ стадион, И. Кулаков нима спортасянін, кытісь уялан бассейн лыддисьӧ Рочму ойвыв-рытвылын 10 медбур бассейн коласын. Нысся сылӧн эм куим спортбаза (Рытвыв туй, 43; Гагарин туй, 47а; Печора туйколас, 110).

Масс-медиа

Печора районын СМИ уджалӧны роч кыв вылын. Петӧ быдлунся газета «Печорское время». Недель вылас ӧтпыр лэдзӧны газетаэз «Волна» да «Новая волна». Шочыника петӧ «Добрая газета города Печора».

Уджалӧ ООО «Телерадиокомпания ‘Волна-плюс’», кӧда лӧсьӧтӧ телевидзӧм кабель пыр да эфир пырйӧт. Сысся электрон масс-медиа коласын ООО «Телекомпания ‘ТВ-Блиц’», радиостанцияэз «Европа плюс Печора» да «Радио Шансон».

Ӧшмӧссэз

• Печора районісь веськӧтланлӧн сайт
• Афанасьев А. П. Топонимия Республики Коми. Сыктывкар: Коми кн. изд-во, 1996 ISBN 5-7555-0554-3
• Жеребцов И. Л. Где ты живёшь: Населённые пункты Республики Коми. — Сыктывкар: 2000.
• Историко-культурный атлас Республики Коми. — М: Дрофа, 1997. ISBN 5-287-00027-8
• Республика Коми. Энциклопедия в 3-х томах. — Сыктывкар: Коми книжное издательство, 1997, 1998, 1999. — Т. I, II, III. ISBN 5-7555-0617-5

Коми Республика веськöтлöм могись янсалöм
Канкар: Сыктывкар Каркытшшез: Вöркута • Инта • Сыктывкар • Уква • Ускар Районнэз: Вуктыл • Емва • Емдiн • Изьва • Койгорт • Кöрткерöс • Кулöмдiн • Луздор • Мылдiн • Печора • Сöснагорт • Сыктыв • Сыктывдiн • Удора • Чилимдiн