Москвина (Кӧчладор район)

Москвина́ — Перем ладорись Коми кытшын, Кöчладор районсис Юксьӧв посадмуын коми грезд (деревня).

Москвина Москвино
Му:	Рочму
Статус:	грезд
ладор:	Перем ладор
район:	Кöчладор район
Важжык ниммез:	Москвин
Инлыдпассэс:	59°49′24″ с. ш. 54°22′58″ в. д.
Веськӧтлан кыв	коми, роч
Отир лыд	79 морт (2009)
Час кытш:	UTC+5+5
Телефон нумерӧ содтӧт:	+7 34293
Почта инпас:	619327
Авто нумерӧ содтӧт:	59, 81

Ним йылісь

Файл:Москвина (Юк). Кöсöгöр.JPG

Кöсöгöр

Файл:Москвина (Юк). Пруд1.JPG

Пруд

Файл:Москвина (Юк). Туйколас1.JPG

Туйколас

Файл:Москвина (Юк). Лавка.JPG

Лавка

Файл:Москвина (Юк)1.JPG

Москвина дынын

География

Москвина сулалö крут мыс вылын, Урьюö усян Уржовчина шор дорын, Юксьöвсянь лунвыв-асыввылö вит километра ылынаын. Москвинасö позьö лыддьыны шöрин туйö с.ш. Юксьöвскöй Турцияын, кытчö пырöны сідзжö матісь грезддэз: Сизьӧв (ойвылö 0,8 км ылынаын), Вершинин (лунвылö 0,6 км ылынаын), Бажӧв (ойвыв-асыввылö 2,5 км ылынаын) да Артипӧв (лунвыв-асыввылö 3,5 км ылынаын).

Москвинаас абу ключчез, сійöн ва коліс кайöтлыны шорсяняс, а öні письктöтöмась артезиан öшымöссэз.

Шор вылас эм басöк пруд.

Туйез

Москвина грездын öні лыддьöны куим туй :

Коми ним	Роч ним
Вердöл туй	ул. Верхняя
Ыджыт туй	ул. Центральная
Учöт туй	ул. Малая

История

Москвина грездыс аркмöма натьтö ХІХ век шöрын, кöр татчö локтöмась овны отир Сизьöвись. Сідзкö видзöтам кö история, Москвина — Сизьöвлöн выселок. 1869' годö татöн олöмась 58 морт, вöлі куим (!) картавыл.

Москвинаыс перво вöлöма Чердын уездісь Юксьӧв волосьын, 1924' во бöрын — Кӧсладор (1926' годсянь Кӧчладор) районісь Вершинин сельсоветын. 1926' вося гижöтöм коста Моквинаись адззöмась 61 мортöс (25 айка, 36 инька), öкмыс кöзяйство.

Лöсьöтöмась колхоз, нимыс унаись вежсьылöма, отир тöдöны да, кöркö вöлі Жданов нима. Сизьöв да Москвина вöлöмась öтік колхоз. Н. С. Хрущёв дырни колхоззэз гырисьмöтасö, быдöс ордча грезддэз лоисö «Калиновка» колхозын.

Сэк жö Вершининісь сельсоветсö вежöмась, Москвинаыс лоис Юксьöв сельсоветын.

1970' годдэзö сельсоветын шуöмась керны Москвинаись сія ладорись учöтик центр, мыля сія сулалöма матынжык тракт дынö. Татчö строитöмась керкуэз, лэбтöмась школа, осьтöмась совхозыслö мöд отделеннё.

Москвинаас пондасö локны овны йöзыс сёрдынжык сулалан грезддэзісь.

Веськöтлан

Ӧні Москвинаыс пырӧ Кӧчладор районісь Юксьӧв посадмуӧ.

Отир

Олöны Москвинаын москви́нчи. Öтік мортсö шуöны москви́нскöй.

2009' во пондöтчикö москвинскöйöсь вöлöмась 79 морт, кöдна видзöмась 24 горт. Этö невна не кыкись унажык 1970' во сьöрті, кöр татісь лыддьöмась 47 мортöс. 2011' во кежö отирыс бöра чинö.

Медваж оліссезлöн фамиллёыс — Сизов, мыля грездсö сувтöтöмась йöзыс ордча Сизьöвись. Сэсся татчö пондöмась локны отир мöдік грезддэзісь, Андров (Бажöвись), Пономарёв (Вершининісь), Федурин (Манастырись), Батуев (Чадзöвись), Гагарин, Фалалеев...

Кöзяйство да быт

Отирыс кöзяйствуйтöны торйын. Быдтöны карч да видзöны пода. Сю озö ни кöдзö.

Эм öтік лавка — ИП Л.Чеботков.

Дзебсьöны москвинчиэз, кыдз и ордча грезддэзісь отир, Ялань шойнаын.

Культура

Москвинаын эм пондöтчан школа, но öні, челядьыс етша лоöмась да, школасö мöдöны пöднавны.

Лыддьöтан

• Коми-Пермяцкий национальный округ. Москва-Ленинград, 1948.
• Кочевский район: прошлое и настоящее / сост. Н. М. Коваль, С. Н. Пыстогова. Пермь, 2006. 464 с. ISBN 5-88009-020-5