Манастыр (Кӧчладор район)

Манасты́р — Перем ладорись Коми кытшын, Кöчладор районісь Юксьӧв посадмуын кöркöся грезд (деревня).

Манастыр Монастырь
Му:	Рочму
Статус:	грезд
ладор:	Перем ладор
район:	Кöчладор район
Важжык ниммез:	Поселье
Инлыдпассэс:	59°50′20″ с. ш. 54°25′34″ в. д.
Веськӧтлан кыв	коми, роч
Час кытш:	UTC+5+5
Телефон нумерӧ содтӧт:	+7 34293
Авто нумерӧ содтӧт:	59, 81

Ним йылісь

Файл:Манастыр (Юк)1.JPG

Файл:Манастыр (Юк)2.JPG

Файл:Манастыр (Юк)3.JPG

Файл:Манастыр (Юк)4.JPG

Пруд

Манастыр шусьö сідз сійöн, мыля татчö локтöмась овны отир Манастыр грездісь, кöда сулалö Гайна районын. Одзжык деревнясö шуöмась сідзжö Поселье нето рочöн Монастыское поселье.

География

Манастыр грезд сулалöма Зьвединка ю дорын (одзжык гижöмась Зелинка, Кузяковка, öні Манастырка), öддьöн гажа местаын, Юксьöвсянь лунвыв-асыввылö сизим километра ылынаын, с.ш. Юксьöвскöй Турцияын.

Татісь шоррез йылісь отирыс висьталöны сідз. Эм пö

• Кутья́ шор, кöда петö сизим ключись и усьö
• Дрöньöвшор вылö, кöда усьö
• Зьведи́нка вылö, а медбöрьяыс — Кыдзыс юлöн вож.

Ордча грезддэз

Манастырыскöт ордчöн сулалöны деревняэз: ойвыв-асыввылö 0,8 км ылынаын Бажӧв, асыввылö 1,8 км ылынаын Сизьӧв, лунвыв-асыввылö куим километра етш ылынаын Вершинин да Москвина. Асыввылö 2,3 км ылынаын сулалöма Чаняыб грезд.

История

Отир басни сьöрті, деревнясö сувтöтöмась Гайна ладорись манаккез, кöдна олöмась сэтчинся Манастыр грездын. Йöзыс вöлöмась пö рочöсь, фамиллёэз Фалалеев, Федурин. Но быдöс сёртоккез сьöрті Манастырас пыр олöмась токö комиэз.

Первуись Монастырское поселье пасйöма карта вылö А. Е. Теплоухов 1848' годö Чердын уездісь вöррез гижалікö. 1869' годö Манастырын олöмась 91 морт (50 мужик, 41 инька), вöлі 10 горт. Сэсся кöзяйствоэз содöмась: 1880' воэзö нія вöлöмась 17-а, 1909' годö 27-а. 1926' вося гижöтöм коста татісь адззöмась 190 мортöс (88 айка, 102 инька) 40 кöзяйствоын.

Манастырын перво вöлі торья колхоз, сэсся быдöс ордча грезддэз понда лоис öтласа колхоз «Калиновка». 1970' воланьын «Калиновкасö» öтлаöтöмась Юксьöвись «За коммунизм» колхозкöт да керисö «Юксьӧвскӧй» совхозлö мöд отделеннёöн. Челядьыс ветлöмась велöтчыны Сизьöвö, сэсся Москвинаö.

Эшö 1970' годö Манастырын олöмась 106 морт. Сэсся грездсö пондöмась лыддьыны перспективатöмöн, трактсяняс ылын да. Отирыс мунісö татісь овны мöділаэзö, Москвинаö да кытчö да.

Веськöтлöм

Манастыр перво вöлöма Чердын уездісь Юксьӧв волосьын, Сизьöв обществоас, 1924' во бöрсянь сія лоис Кӧсладор (1926' годсянь Кӧчладор) районісь Вершинин сельсоветын. 1960' воэзö, Вершининсис сельсоветсö вежöмась да, Манастыр пыртöмась Юксьӧв сельсовет увтö. Öні, 2006' восянь мувывторыс — Кöчладор районісь Юксьӧв посадмуын.

Отир

Öні Манастырас некин ни оз ов.

Отирыс шусьöмась манасты́рчи. Öтік айка морт — манасты́реч, инька морт — манасты́рка. Тöдчаннимыс манасты́рись нето манасты́рскöй.

Ордча грезддэзын татісь оліссесö нимкодявлöмась сьöд манастырчи.

Берся

• Öні Манастыр грезд местаын — паськыт видз, öті-öті сулалöны куим керку.
• Грездыс кöть и шусьö Манастыр, но татöн не токö некöр манастырыс эз вöв, а нельки часовенка абу сулавлöма.

Лыддьöтан

• Коми-Пермяцкий национальный округ. Москва-Ленинград, 1948.
• Кочевский район: прошлое и настоящее / сост. Н. М. Коваль, С. Н. Пыстогова. Пермь, 2006. 464 с. ISBN 5-88009-020-5