Илля (Кудымкар район)

Илля́ — Перем ладорись Коми кытшын, Кудымкар районісь Белоёв посадмуын коми грезд (деревня).

Илля Ильичи
Му:	Рочму
Статус:	грезд
ладор:	Перем ладор
район:	Кудымкар район
Инлыдпассэс:	59°12′26″ с. ш. 54°30′38″ в. д.
Веськӧтлан кыв	роч, коми
Отир лыд	30 морт (2009)
Час кытш:	UTC+5+5
Телефон нумерӧ содтӧт:	+7 34260
Почта инпас:	619556
Авто нумерӧ содтӧт:	59, 81

Ним йылісь

Вöлöмась пö кык вон, Козлов Иван да Козлов Илля. Öтыс пуксьöма овны сэтчö, кытöн талун Козвовчи, мöдыс татчö, сійöн и шусьö грездыс Илля, нето рочöн, сы пияннэз сьöрті, Ильичи.

География

Илля грезд сулалö Метшкöр ю шульга вадöрын, Кöзвовскöй шор уссё сайын.

Ордча грезддэз

Ордчöн адззам деревняэз: лунвылас 1,5 км ылынаын Карбас, асыввылас километра етш ылынаын Козвовчи, рытвылас 2 км ылынаын Епанов да ойвылас 3 км ылынаын Чибьян.

Матісь ландшафттэз

• Амба́рвог
• Ва́сай (видз, сэтчин эм Ва́сайвог)
• Галесьни́к (Метшкöр вылын, Дворишшо да Наумковидззез коласын)
• Двори́шшо (шутём да вöр)
• Крути́к (лунланьын, вöраин, Метшкöр дорын)
• Наумковидззез (Пеписьнюр да деревня коласын)
• Ойтоо́вскöй < Ойтöловскöй (вöр, сэтчин эм Ойтоо́вскöй вог)
• Ошсіта́н (вöр, вог, пес керассэз)
• Пеписьню́р (вöр, ыб, видз)
• Пескера́с (вöр, сэтчин эм Пескерасвог)
• Пожума́ин
• Сайдвори́шшо (шутёммез да вöр)
• Тэлё́к (неыджыт вöрок)
• Учöтво́г
• Чöвпанмы́ск (ыббез, вöр, шутём)
• Ыджытво́г (3 км кузя)
• Ярашшутём (могильник)
• Ярашшутёмы́б
• Ярашшутёмвог

Туйез

Официальнöй ниммез деревняись туйезлö абу сетöмась .

Былись Илля грездын кык кузькодь туй, кöдна мунöны меридиан пöлöнжык. Энö туйесö йитöны нёль дженыт туйколас. Эшö öтік кузь туй гöгöртö деревнясö асыввылöттяс (ферма дорöт мунö).

История

1869' вося список сьöті Илляын воля сетікö вöлöма 9 картавыл, олöмась 36 мужик морт да 25 инька морт.

XX век пондöтчикö грездыс вöлöма Перем губерниялöн Совкар уездісь Белоёв волосьын, Карбас обществоас.

1926' вося гижöтöм коста Илляын олöмась 175 коми морт (79 айка, 96 инька), сулалöма 29 кöзяйство.

1924' восянь Илля грезд лыддисьöма Кудымкар районісь (1941'-1959' воэзö Белоёв районісь) Карбас сельсоветын. Перво пö татöн нельки вöлöма сельсоветыслöн шöрин.

1970'-80' воэзö Илляын вöлі совхозлöн ферма, кытöн видзöмась пода 200 юрöн (мöссэз, куканнез, откормочник).

2006' во пондöтчикö, виль роч туйдöт сьöрті сельсоветсö Карбассис пöдналöмась, да Илля грезд лоис Белоёв посадмуын.

Веськöтлан

Öні Илля грезд пырö Кудымкар районісь Белоёв посадмуö.

Отир

Олöны Илляын илляо́вса, öтік морт йылісь шуöны илляо́вскöй.

Гумагаэз сьöрті 2009' во пондöтчикö Илля грездын олöмась 30 морт, кöдна видзöны 14 горт. Былись деревняас олöны 20 морт кыным.

Медваж памиллёыс татöн Козлов. Отирыс гишшöны сідзжö Суранов, Епин, Майбуров, Канюков, Гусельников, Катаев.

Оліссез комиöсь, баитöны комиöн.

Кöзяйство да быт

Илляын оліссез уджалöны асланыс карчйöрын, видзöны пода, керöны аскур.

Ыджыт уджаиннэз, лавкаэз, ФАП, велöтчанін, канкеркуэз да роч цивилизация мöдік мыччаланнэз Илля грездын абуöсь нач.

Босьтасьны да мый да отирыс ветлöны Карбасö.

Туйез умöльöсь, ас машинаэз отирлöн абуöсь, мед пуксьыны автобусö колö мунны Карбасöдз.

Грездас позьö видзöтны телевизор, эмöсь телефоннэз.

Кулöммезнысö илляовса кайöтöны Ярашшутём вылö. Этія шойнаыс (могильникыс) куйлö Козвовчилань кайикö веськытланьын керöс вылын вöрын.

Культура

Челядьсад не, школа не абу. Татісь челядьыс велöтчöны Белоевын, кытöн нія олöны интернатын.

Культура керку ордча Карбасын.

Илляын порйöтöны Иллялун, кöда татöн престольнöй празьник.

Гора нима отир

• Козлов Василий Васильевич, (чужис 1969 воö) коми поэт, писатель, вуджöтiсь, общественнöй деятель
• Эпин Ефим Павлович, (1901-1981), генерал-майор.

Лыддьöтан

• Коми-Пермяцкий национальный округ. Москва-Ленинград, 1948.