Ниппон:Версияэзлӧн торьялӧм

'''Ниппон''' нето '''Нихон''' (ниппон кыв вылын '''中国''', рочöн '''Япония''') — Асыввыв [[Азия]]ын, діэз (островвез) вылын вына канму. Тыр нимыс — '''Ниппон канму''' 日本国 ('''Ниппон коку''' нето '''Нихон коку''').

Археологгез шуанöн отирыс олöны öння Ниппон му вылын [[вылісь палеолит]] кадсянь. Первуись Ниппон йылісь казьтывсьö Китайись хроникаэзын [[миян эра]]ся I векын. Ниппонса понда öддьöн ассяма то мый: нія мукöд коста паськыта босьтлöмась культура йöзладорись, а мукöдкоста дыр кежö пöднассьывлöмась быдöс мирсис. XIX век помын да XX век пондöтчикö Ниппон лоис вына военнöй канмуöн, вермис китайсаöс, роччезöс, а сэсся и [[дӧсмирись медодзза война]]ын лоис вермиссез коласын. 1937' годсянь Ниппон пондöтіс мöдік война Китайлö паныт, кöда сэсся вуджис [[Дӧсмирись мӧд война]]ö. Этія войнаын Нипонсö пасьвартісö 1945' годö, кöр [[Хиросима]] да [[Нагасаки]] вылö чапкöмась [[атомнӧй бомба]]эз. 1947' годö канмуын примитöмась виль конституция, кöда сьöрті Ниппоныс лоис [[парламента монархия]]öн.

Ниппон - ыжжыт вын мирись [[экономика]]ын. Сылöн [[БПЛ]] (быдöс пытшкöсся лэдзöмыс) ыжда сьöрті му югытас куимöт. [[Экспорт]] да [[импорт]] сьöрті Ниппоныс нёльöт местаын мирын. Кöть и сылö конституция сьöрті оз позь видзны [[армия]], Ниппонын эм асдорьян выннэз, кöднö позьö ыстывлыны йöз муэзö раммöтан могöн. Ниппоныс [[мортвийöм]] сьöрті мирас мöд местаын улісянь ([[Сингапура]] бöрын). Шуöны, Ниппонын пö отирыс олöны дыржык, нежö быдöс мöдік канмуэзын.