Мелюкинчи (Юсьва район)

Мелю́кинчи нето Мелю́кина — Перем ладорись Коми кытшын, Юсьва районсис Юсьва посадмуын коми посад.

Мелюкинчи Мелюхино
Му:	Рочму
Статус:	посад
ладор:	Перем ладор
район:	Юсьва район
Инлыдпассэс:	58°52′32″ с. ш. 54°50′08″ в. д.
Веськӧтлан кыв	коми, роч
Отир лыд	307 морт (2009)
Час кытш:	UTC+5+5
Телефон нумерӧ содтӧт:	+7 34246
Почта инпас:	619191
Авто нумерӧ содтӧт:	59, 81

Ним йылісь

Файл:Мелюкинчиын1.JPG

Мелюкинчиын

Файл:Мелюкинчи.Школа.JPG

Школа

Файл:Мелюкинчи. Тарабайка пос.JPG

Тарабайка пос

Файл:Мелюкинчи.Сельсовет.JPG

Сельсовет

Файл:Мелюкинчи.Лавка1.JPG

Сельполöн лавка

Мелюкинчи шусьö сідз Мелюхин гишшан сьöрті. Отир шуöны Мелюкинчи и Мелюкина.

География

Мелюкинчи сулалö Юсьва ю дорын, Кудымкарсянь асыввыв-лунвылö 18 км ылынаын, Юсьва посадсянь рытвыв-лунвылö 11 км ылынаын.

Ордча грезддэз

Мелюкинчисянь асыввылö километра ылынаын сулалöны грезддэз Баидзовчи да Чубаровчи, асыввыв-лунвылас 1 км ылынаын Тарабаевчи, рытвыв-лунвылас 2 км ылынаын Потинчи. Асыввылас 3 км ылынаын поздісьöм Сивашор, асыввылас 3,5 км ылынаын — Тумень. Асыввыв-ойвылас 3 км ылынаын адззам Керинчи, рытвыв-ойвылас 2,6 км ылынаын — Обиринчи.

Матісь ландшафттэз

Мелюкинчи сулалö Юсьва веськыт ладорын, Тарабайка шор уссёланьын.

Татісь ландшафттэз:

• Баранвöр, Юсьва сайын
• Изгарьян
• Клубкерöс
• Липина керöс, Обиринчиланяс
• Пыдын кобот
• Школьнöй кобот
• Цветнöй кобот, сэтчин брод

Янсалöм

Посадас кык ыджыт тор: Важ Мелюкинчи да Виль Мелюкинчи.

Микрорайоннэз:

• Виль посёлок, асыввылас
• Кожов, шöрас, кык лог коласын
• Кузнецова, лунвылас, ~ Важ Мелюкинчи
• Маслов, ойвылас, лог сайын

Туйез

Мелюкинчи посадісь кыкьямыс туй öні новйöны тодиль ниммесö

Коми ним	Роч ним
Асыввыв туй	ул. Восточная
Видз туй	ул. Луговая
Виль туй	ул. Новосёлов
Вылісь туй	ул. Нагорная
Коми туй	ул. Пермяцкая
Улісь туй	ул. Набережная
Школа туй	ул. Школьная
Ыджыт туй	ул. Центральная

История

Татісь асладор туяліссез сьöрті , Мелюкинчи посад аркмöма да зорамöма то кыдз:

Медодзза оліссез вöлісö Захароввез. Кöр Захаров грездö локтöмась Сергиевскöй волосись виль оліссез, Туляеввез, деревнясö пондöмась шуны Кожов, мыля нія вöлöмась кучиккериссез. Виль грездыс быдмöма кык кырас коласын.

Сьöраныс татчö Ятка губернясис локтöмась Мелюхиннэз. Нія пуксисö овны Кожовсянь лунвылас да пондöмась шуны грезднысö Кузнецова, мыля вöлöмась дориссез. Дорсянін сулалöма ю дорын, талуння мастерскöйезланяс.

Мелюхиннэз бöрын локтöмась Ӧнь ладорись Ошмариннэз, кöдна пондöмась овны Кожовсянь ойвылас, кырас сайын. Нылöн оланін шусьö Маслов.

ХХ век пондöтчикö Кожовсö сотöма лёкби. Кынымкö увтырлö, керкутöг кольччисö да, ковсис мунны овны мöділаö. Кожов грездыс разьсьöма. Туляеввез кольччöмась куим семья. Нія öтлаасьöмась Кузнецовакöт. Мелюкинчи увтырыс пондіс быдмыны и чожа Кузнецова грездын лоис медыджыт. Сэк и сетöмась деревняыслö виль ним Мелюкинчи.

Важ небöггез сьöрті история чулалöма сідз.

1869' годö Мелюкинчиас вöлі деревня Милюхина (Кузнецова), олöмась татöн 69 морт (32 айка, 37 инька), кöдна видзöмась öкмыс горт. Верстаöн ойвылас вöлі ыджытжык деревня Маслов (Кöчов), кытöн вöлі 16 горт да олöмась 93 морт (44+49). Эна деревняэз коласын вöлі починок Сивухин, кытöн вит гортын олöмась 23 морт (12+11).

1890' воэзö татöн строитöмась вичку-школа.

ХХ век пондöтчикö Мелюкинчи, Маслов да Сивухин лыддисьöмась Юсьвинскöй волосись Кожевскöй обществоын.

1926' годö Маслов (Сивухин) деревняын кольччöмась 15 горт, а отирыс чинöма 79-öдз (31+48), а Мелюкинчиыс быдмöма: горттэс лоöмась 33-а, а отирыс 149 морт (71+78). Сэк Мелюкинчиас лоис ни сельсовет.

Сельсоветыс посадас пукаліс 2006' воöдз, кöр виль роч туйдöттэз сьöрті, Мелюкинчи да сы гöгöр деревняэсö пыртöмась Юсьва посадмуö.

Веськöтлан

Öні Мелюкинчиыс лыддисьö Юсьва районісь Юсьва посадмуын, посадмусянь Мелюкинчиын уджалö юралан специалист.

Отир

Мелюкинчиын оліссез сідз и шусьöны — мелюкинчи, а öтік мортсö шуöны мелюкинскöй.

2009' во пондöтчикö гумагаэз сьöрті татöн пыр олöмась 307 морт.

Отирыс комиöсь, баитöны комиöн.

Фамиллёэз коласын медодзза местаын Мелюхин да Тарасов.

Мöдік гишшаннэз:

• Аристов
• Базанов
• Боталов
• Водолеев
• Казанцев
• Мальцев
• Михалев
• Коньшин
• Обирин (Оборин)
• Петров
• Трубинов
• Хорошев

Ордча посаддэзын Мелюкинчиланьын оліссесö сералöны сакар сёйиссезöн, мыля Ыджыт косясян коста, татісь отир пондылöмась пö дзебны юö сакар мешöк (сакарсö сэк кыскалöмась мелюкинскöй тракт кузя).

Кöзяйство да быт

Посадын советтэз кадсянь кольччöма öтласа кöзяйство *ООО "Мелюкинскöй" (одззася совхоз). Сійö видзö ас кипод увтын Юсьваись "Заря будущего" колхоз. Отирыс кöдзöны сюэз, видзöны мöссэз. Йöвсö вузалöны Юсьва пыр.

Совхозлöн эм контора, гараж, ферма, куканьвидзан, сюкосьтан.

Матын эм автотыртан.

Мелюкинчиын öні вузасьöны куим магазин:

• сельпо
• федосеевскöй
• трубиновскöй

Йöзöс вердöны столовöйын. Кöркö вöлі асланыс няньпöжалан.

Автобус Кудымкарöдз (Юсьва пырйöт) ветлö кыкись луннас, мунö асывнас 8:10 да рытнас 5:40. Вöлі сувтчан, öні сійö разьöмась.

Ас машинаэз мелюкинчиэзлöн эмöсь, но не öддьöн уна.

Татісь ФАП-ын уджалöны кык морт: пельшöр да медсой (одзжык медперсонал вöлі 6-7 морт, нельки пиньвеськöтісь вöлöма).

Дзебсьöны Мелюкинчи ас шойнаö, кöда куйлö посадсяняс асыввылын.

Культура

Клуб пондіс киссьыны да сійö разьöмась, öні культура пельöсок ФАП керкуын. Сэтчин жö библиотека.

Быд субöта чулöтлöны дискотекаэз.

Спортзалын мастерскöйезкöт ордчöн, сія сідзжö "повзьöтчö" ни.

Мелюкинчиын эм под школа, кытöн уджалöны 10 морт велöтісь и велöтчöны морт челядь. Директорыс Тарасова Галина Власовна.

Посадын эи куим челядьсад.

Вичку Мелюкинчиын важын ни кисьтöмась.

Казьмöтаннэз да сингажöтаннэз

• В.И.Ленинöс казьмöтан, öні жугдöм ни, кольччöмась токö юр да коккез.
• Öшалан пос

Лыддьöтан

• География Коми-Пермяцкого автономного округа. Пермь, 1992. ISBN 5-7625-0162-0.
• Коми-Пермяцкий автономный округ на рубеже веков. Кудымкар, 2000. ISBN 5-87901-051-1
• Коми-Пермяцкий национальный округ. Москва-Ленинград, 1948.
• Юсьвинский район. 85 лет. Пермь: Изд-во «Пушка», 2010. ISBN 978-5-98799-072-8

Ыстісяннэз

Шаблон:Юсьва посадмуись оланіннэз