Кӧс (посад)

Кöс — ыджыт посад Перем ладорись Коми кытшын, Кӧсладор районлöн да Кӧс посадмулöн веськöтлан шöрин.

Кӧс Коса
Му:	Рочму
Статус:	посад
ладор:	Перем ладор
район:	Кöсладор район
Медодз казьтылӧм:	1579
Важжык ниммез:	Ныров
Инлыдпассэс:	59°56′44″ с. ш. 54°59′35″ в. д.
Веськӧтлан кыв	коми, роч
Отир лыд	2296 морт (2009)
Час кытш:	UTC+5+5
Телефон нумерӧ содтӧт:	+7 34298
Почта инпас:	619430
Авто нумерӧ содтӧт:	59, 81

Ним йылісь

Файл:Кöс. Микола вичку.JPG

Микола вичку

Файл:Кöс. Важ школа.JPG

Важ школа

Файл:Кöс. Ленин туй.JPG

Ленин туй

Файл:Кöсладорись суд.JPG

Кöсладорись суд

Файл:Кöс. Öшымöс1.JPG

Öшымöс

Файл:Кöс. Культура керку.JPG

Культура керку

Файл:Кöс. Аптека.JPG

Аптека

Файл:Кöс. Банк.JPG

Банк да Загс

Файл:Кöс. Öшымöс2.JPG

Öшымöс Ленин туй дорын

Файл:Кöс. Элис лавка.JPG

Элис лавка

Файл:Кöсладорись веськöтлан керку.JPG

Кöсладорись веськöтлан керку

Файл:Кöс. Ыджыт школа.JPG

Ыджыт школа

Файл:Кöс. Карл Маркс туй.JPG

Карл Маркс туй

Кöс посад шуöны сідз натьтö Кöсва ю сьöрті. Одзжык сія котöртöма посад дорöттяс, а сэсся воргаыс вежсьöма, и посадыс кольччöма кöсінас.

География

Кöс посад сулалö важ сибир тракт дорын Кöсва юсянь рытвылö 2,5 км ылынаын да Лолог юсянь лунвылö кык километра ылынаын.

Кöс посадсянь Кудымкарöдз 163 км, Перемöдз 338 км ылына.

Ордча оланіннэз

Асыввылас Кöс посад бердын сулалö локтіссезöн лэбтöм Кордон посёлок, рытвылас километра етш ылынаын — Абрамöв грезд. Кöс да Абрамöв коласын адззам Сельхозтехника посёлок. Кöссяняс лунвылас куим километра ылынаын поздісьöмась деревняэз Виль Гущин да Важ Гущин (кöднö одзжык шуöмась Октыльсорд), ойвылас кыкьямыс километра ылынаын сулалö Увдöр Кöс.

Матісь ландшафттэз

Яггез:

• Пöи́мъяг (Лолог сайын)
• Ыджы́тъяг
• Шӧ́ръяг
• Чо́ртöмти́рьяяг

Ыббез

• Церко́внöй ыб
• Викӧ́рыб нето Викöрпа́шня — шойнасянь веськытлань
• Тука́чыб — вöрьяин (ойвыв-рытвылас)

Шоррез

• Папа́нкашор, сы вылын эм пруд (ойвылас)
• Корча́гашор (асыввылас)
• Миськася́ншор (лунвылас)
• Ыджытшор (рытвылас 5 км ылынаын)
• Бы́кыбшор
• Макси́мовшор

Тыэз:

• Дзо́льты
• Ёдыа́ты
• Ёкыша́ты
• Пипуа́ты

Нюррез:

• Джыннюр
• Öзын, Селишсянь веськытвыв

Янсалöм

Гырися кö юкны, посдас эм кык тор: У́рдöл (асыввылас) да Ве́рдöл (рытвылас). Урдöлыс — важ посад, вердöлыс — сёрöнжык овмöтöм район.

Татісь отир тöдöны и поснитжык мувывторрез посаданыс:

• АБЗ (ойвылас)
• Бам (лунвылас)
• Доротде́л (лунвылас)
• Кавка́з — ыджыт школа сайын, гуналаньын, больнича одзын (рытвылас)
• Кирпи́чнöй нето Кирзаво́д (ойвыв-рытвылö 2 км)
• Корча́га — Корчагашор ладорас, важ пöжалан дынын, öнняся шойна (ойвыв-асыввылас)
• Метеоста́нция
• На́мчой (варианттэз На́нчой, На́мчи чой, На́мчу гöра) — мыс (ойвылас)
• ПМК
• Пыштыкыры́л — öння Пролетариат туй да Коми туй увдöрын (лунвыв-асыввылас)
• Се́вер нето Больни́чнöй городо́к (рытвылас)
• Совхо́з
• Ся́пар — аэропортланьын (лунвылас)
• Шо́рдор (лунвылас)

Туйез

Кӧс посадын вот öктіссез лыддьöны 18 туй :

Коми ним	Роч ним
Вöр туй	ул. Лесная
Гöрдармия туй	ул. Красноармейская
Киров туй	ул. Кирова
Кирпич туй	ул. Кирпичная
Клещин туй	ул. Клещина
Колхоз туй	ул. Колхозная
Коми туй	ул. Пермяцкая
Ленин туй	ул. Ленина
Мир туй	ул. Мира
Пелідза туй	ул. Рябиновая
Первомай туй	ул. Первомайская
Пролетариат туй	ул. Пролетарская
Совет туй	ул. Советская
Том туй	ул. Молодежная
Урал туй	ул. Уральская
Фадеев туй	ул. Фадеева
Ыб туй	ул. Полевая
Электриккез туй	ул. Электриков

Былись туйез унажык.

Медшöр улица — Ленин туй. Сія мунö посадöттяс параллель пöлöн, рытвылас петö кар сайö да пöртчö Юксьöв трактö, асыввылас петö Кордонланьö. Лунвылöттяс Ленин туйсяняс нюжалöны Гöрдармия туй, Пролетариат туй, Коми туй, Киров туй, Мир туй, ойвылöттяс — Колхоз туй да Первомай туй.

Меридиан пöлöн медшöр туйöн позьö лыддьыны Совет туй, этія туйыс петö карсайö да пöртчö Пуксипи трактö. Асыввылас Совет туйсянь куйлö Боталов туй, кöда ойвылас петö кар сайö да пöртчö Светлича трактö. Рытвылас Боталов туйсянь куйлöны Карл Маркс туй, Октябся туй, Партизан туй, Голев туй.

Ленин туй да Совет туй вожасянінын сулалö Микола вичку да культура керку.

История

Кöсладорын отирыс олöны важынсянь. Кöс посадсянь ойвылö 3,5 км ылынаын археологгез адззöмась неолит кадся йöзлісь сувтчанін (II сюрсво миян эраöдз). Родановсалісь карколяс адззöмась посадсянь рытвылö 5 км ылынаын, Ыджытшор уссёын.

XVI век помсянь Кöс пырйöт мунöма ыджыт сибир туй.

Роччез первуись казьтылöны татісь оланін 1579' годö. Сэк Яхонтов гижöма сійö кыдз Ныров погост, кытöн вöлöмась 14 горт.

1623' годö Кайсаров гижö ни погост Коса, Ныров тож йылісь, кытöн вöлöмась 41 горт да 44 айка морт. Гижись казьмöтö, тавö пö татчö вовлöма лёкби, чарöтöма да, 41 керку сотчöма. Кöс погостын сэк сулалöма пуовöй вичку, а ачыс сія вöлі татісь кытш понда шöрин (быдсöн сы кипод увтын олöмась сизим грезд).

1769' годö Кöсын лэбтöмась виль пуовöй вичку.

XVIII век помын Кöс посадыс лыддисьö Селиш волосьын.

1802'-1812' воэзö строитöмась изовöй Микола вичку.

1840' во кежö Кöс посад пырöма Юксьӧв волосьö. Посадын вöлі сельскöй управленнё, кöда кипод увтын олöмась 13 оланін. Кöсын сэк олöмась 227 айка морт, видзöмась 80 горт.

1876' восянь Кöсын уджалö пондöтчан школа (1908' восянь лоис кыккласса, 1910' восянь нёлькласса)

1879' годö вöлі ошкöм виль план, кöда сьöрті посадсö и пондöмась зорöтны, Кöсын лоисö веськыт туйез. Лэбтöны кыксувда керкуэз, лавкаэз.

1910' во кежö посадас уджалöма нёлькласса велöтчанін, лыддьöтанін-библиотека да больнича, ветеринар пункт, земстволöн станция. Вузасьöмсь 12' лавкаын да казналöн вина вузаланын. Быд кресення чулöтлöмась вузасян луннэз, а май 6' лунö да декаб 9' лунö осьтлöмась торжоккез. Отирыс кöдзлöмась рудзӧг, ид, зӧр, етшажык шогді, анькытш да шабді.

1924' восянь Кöс посад - Кöсладор районлöн веськöтлан шöрин.

Веськöтлан

Кöс посад Кöсладор районлöн да Кöс посадмулöн шöрин.

Татöн уджалöны Кöсладор районлöн веськöтлан да Кöс посадмулöн веськöтлан.

Отир нимсянь баитöны Кöсладöр районісь земство öксян да Кöс посадмуись депутаттэзлöн совет.

Кöсісь отирöс судитö Кöсладор районлöн суд.

Канму нимсянь сідзжö уджалöны:

• Рочму почталöн юкöт №619430
• Рочму сбербанклöн юкöт
• МЧС-лöн кусöтчан юкöт

Отир

Олöны Кöс посадын кöси́нчи; айка мортöс шуöны кöси́неч, инька мортсö кося́нка; тöдчаннимыс кöси́нскöй нето кӧ́сісь.

Оліссезлöн лыд 2009' во пондöтчан кежö вöлі 2296 морт, гортвидзаннэз вöлöмась 857-а.

Отир лыдыс кад сьöрна вежсьылöма то кыдз:

во	1909	1926	1936	1959	1970	2007	2010
морт	1613	1300	1788	1900	1953	2271	2325

Татісь отирын токö 30% лоöны важ оліссезлöн пияннэз, а 70% — локтіссез. Отирыс баитöны унажыксö рочöн, челядьсö комиöн озö велöтö.

Медуна отир новйöны фамиллёэз:

• Батуев (Чадзöвись)
• Голев (Улісь Кöсісь)
• Денисов
• Ильиных (Бачманöвись)
• Кочев
• Кучев (Гортлудісь)
• Морошкин
• Останин (Маскались)
• Панов
• Петров
• Снигирев
• Удников
• Федосеев (Чуракись да Пуксипиись)
• Чугайнов
• Шляков (Чиркöвись)

Кöсісь увтыррез (рöддэз):

• Бага́й
• Бе́лич
• Бра́гин
• Ви́кул
• Де́нич
• Кӧ́врич
• Лу́кан
• Лу́кич
• Наде́я
• Ӧ́ртя
• Педӧ́т
• Пе́падь
• Пе́ршин
• Пе́трич
• По́лич
• Ра́тник (важ)
• Ре́кит
• Са́нко
• Со́па
• Сту́кöв (важ)
• Ся́пар
• Ту́пöсь
• Ту́рпа
• У́лич
• Чаща́реп
• Шо́мпич

Кöзяйство да быт

Кöс посадын уджалöны:

• куим асторья вöрпилитан
• 8 асторья магазин
• лесхозлöн контора
• ветеринар пункт

Райполöн

• няньпöжалан
• йöзöс верданін
• шырсянін
• 4 лавка

Эм берсянас вузасянін (базар).

Шöрись шонтісян ни канализация абу. Лонтісьöны песöн. Вавайöтан лöсьöтöма öті-öті.

Эм автостанция. Автобус ветлö Перемöдз да Кудымкарöдз öтпыр ойлуннас. Позьö корны такси.

Уна отирлöн эм ас машина.

Посадын эм ЭТУС-лöн цех, уджалöны гортся телефоннэз да таксофоннэз.

Мобильник кутö токö UTEL.

Косинчи вермöны видзöтны телевизор, радио позьö кывзыны токö приёмниккез пыр.

Лысинвидзан

• Район понда больнича
• Район понда аптека
• Амбулатория (поликлиника)
• Пöриссез понда керку

Велöтан

• 2 челядьсад
• пондöтчан школа
• музыкаö велöтан школа
• шöрöт школа

Культура

• Культура керку
• Челядьлісь кужöммез зорöтан керку
• Районісь этнография да быт сьöрті музей, осьтöм 2011' май 18' лунö
• Район понда библиотека
• Челядь понда библиотека
• Микола вичку, вились осьтöм 1990' годö

Масс медиа

• «По новому пути» газета
• «Косинский вестник» газета

Казьмöтаннэз да сингажöтаннэз

• Асйöз косясянын вийöммезöc казьмöтан
• Ыджыт косясянын усьöммезöс казьмöтан
• Микола вичку (1845' во)
• Важ больнича (1914' во)
• Важ велöтчанін (1915' во)

Гора нима отир

• Бражкин Анатолий Васильевич (*1958)
• Духова Алла Владимировна
• Тонков Владимир Николаевич (1872-1954)

Берся

• Кӧза — Кöс посадын медрадейтана пода. Гожумнас кöзаэсö торйöн и табуноккезöн адззылан посадас быдлаись. Кöть быдöнныс и норасьöны, кöзаэз пö зника оз сетö а...

Лыддьöтан

• Коми-Пермяцкий национальный округ. Москва-Ленинград, 1948.
• Коми-Пермяцкий автономный округ на рубеже веков. Кудымкар, 2000. ISBN 5-87901-051-1
• Мартынов М. Е. Селения Косинского района. Справочно-статистический материал. Кудымкар, 2009. ISBN 978-5-87901-127-2
• Шаги времени. К 80-летию образования Косинского района / редактор-составитель О. П. Кучева. Пермь, 2004. ISBN 5-93683-030-X.
• Кöс посад йылісь «Перем ладор» энциклопедияын

Ыстісяннэз

Шаблон:Кӧс посадмуись оланіннэз