Кудым Ош

Кудым Ош - Иньва ладорись легендаэз сьöрті коми отирлöн важ герой. Кудымкар аркмöтісь.

Кытшöм вöлі Кудым

Кудымыс вöлöма ош кодь вына, сысянь и шуöмась сiйö Кудым Ош. Вöлöма мортыт куим аршин сувда, муыс сылö вынсö да мывкыдсö куим мортлiсь сетöма, а синнэс и ойнас тупкася буржыка аддзöмась.

Пасьтасьöма сiя не бура, не басöка, а тöв и гожум новйöма кучиккезiсь вурöм паськöм да кöмкöт, а юрсö не зэрсянь, не лымсянь, не шондiсянь, не лёк тöвсянь абу сайöвтлöма.

Кудымлöн мам да Чикыш

Кудым Ошлöн вöлöма ён высина мам — ыджыт мыгöра да мывкыд юра инь, кöдö шуöмась Пöвсин. Сiя быдöс родсö ас кипод увтас видзöма, и быдöнныс сiйö кывзöмась. Ачыс уджавлöма мужыккескöт тшöтш, гортас ыджыт кринкаöн ва кайöтлöма да абу кошшывлöма лаб каянiнсö, а кайлöма крутикас веськыта.

Пöвсин öддьöн радейтöма Ойпельöс — чудь отирлiсь бур енсö, и эта понда Ойпель пыр отсавлöма сылö.

Ныкöт жö олöма мöдiк инь — уна тöдiсь Чикыш. Сiя учöтсянь велалöм веськöтчыны да тшыкöтчыны, кужлöма изiсь шедтыны бичир, вийöм мортöс ловзьöтлöма. Тöдчывлöм Чикыш вöрись дядькöт — Сюра-пелякöт и вермывлöм пöртмавны мортлiсь синнэз.

Кудымлöн ай

Кудым Ошлöн айыс, Сылпанiсь пам, ветлывлöм войнаöн мöдiк увтыррез вылö: Курöгкарö и Круточойö, Кама дорö и Йöграö. Öтiк ветлансянь сiйö вайöтöмась кулöмöн, и нельки Пöвсин иньыс — Ойпельöс бура радейтiсь, да уна тöдiсь Чикыш абу вермöмась ловзьöтны сiйö.

Дзебöмась памсö Кува дорö, Изъюр мыс вылö, кытöн вöлöма еннэзлöн горт. Чудь увтыр сэтöн юрбитлöма еннэслö да казьтывлöма кулöм-вийöм отирöс.

Дзебасö сылпанса пöрись памнысö да пондасö бöрйыны виль памöс. И керасö памнас Кудым Ошöс. Сетасö сылö памлiсь паськöм да пас, бура юрбитасö Ойпельлö, тшöктасö берегитны Кудым Ошöс пöрöссянь да тшыкöтöмсянь, а эшö ёнжыка берегитны лёк ньöвъёссезсянь да лэчыт пуртсянь. А сыбöрын и том памлö висьталасö, медбы сiя сiдз жö бура, кыдз и пöрись памыс, дорйис нылiсь гортнысö да отирсö, челядьöс и пöрисьöс, медбы сылпанса лэчыта видзисö шодззезнысö, а ньöвъёссез медбы прокод вöлi мавтöмöсь бильöн.

Виль оланін

И сэтöн чудь увтыр казялас, кыдз шондiыс югдöтö Изъюр керöссö. Ачыс пö шондiыс мыччалö, кытöн пондам овны, - висьталас Кудым Ош да иньдöтчас сэтчин, Кува ю дорас. А сы бöрсянь мунасö томмес и кыссясö пöриссес. И керасö сэтчин аслыныс виль горт, йöръясö сiйö вылын йöрöн-заплотöн. И шуасö чуддэз ассиныс виль гортнысö Кудым кар

Босьтас Кудым Ош бур козин да гöснеч и ветлас Изкарö, воннэз дынö, ваяс сэтчинiсь кöртовöй черрез, пурттэз да ньöвъёсь йыввез. А эшö тöдас мыйись сэтчин кöрт керöны и кыдз кöртсис чер-пурт дорöны. Сэксянь Кудымкарын лоас асланыс кöрт.

Юксякöт тышкасьöм

Кынымкö год бöртi, кöр уна ни öксяс няньыс, Кудым Ош корас гöссезöс, вердас нiйö чöскыт няньöн. Корас быдлаись, а Юкся оз лок: юöрыс сы дынöдз абу мунöма.

Эта кадсянь чудь увтырыс дугдöма öта-мöдкöт лёкасьны.

Кудым Ош няньсö быдöнныслö сетöма: Кöчлö и Пальлö, Юксялö и Анюшлö, Купралö и Майлö, кöр нiя янсöтчöмась сы дынiсь. Эта понда Кудым Ошсö отирыс вексö донтöм и казьтылöм бур кылöн.

Кулöм

Костö недыр олöма, а Кудым Ош сто год да эшö джын сто олас, и вöлись кулöмыс сы дынö локтас.

Пондас кувны богатыр, корас дынас Ошпиян зонсö да висьталас: — Кöр ме кула, пуктö менö сыспуись керöм гробö, а гробсö вартö кöртöн и крепыта игналö, ась и ва воть сэтчин оз сюр. Ме узя, мымда колö, и сайма. А кöр сайма, тiянлö олансö эшö буржыкö кера. Но и тiйö весь эд олö, прокод кошшö аслыныт шудсö. И ёртасьö матiсь и ылiсь йöзкöт. А öнi прошшайтчö мекöт. Быд мужык ась павкöтчас веськыт пельпон бердам öтiк чуньöн да босьтас менчим вын. Кин павкöтчас кык чуньöн да босьтас кыкись унажык вын, сiя выныс лоас лёк вын.

Прошшайтчасö отирыс, и Кудым Ош онмöссяс кыз онöн.

Öшмöссэз

• Ожегова М.Н. Устнопоэтическое творчество коми-пермяцкого народа. Кудымкар, 1961.
• Оласö да вöласö. Лöсьöтісьыс В.В.Климов. Кудымкар, 1991. ISBN 5-7625-0262-7