Канюков Иван Иванович

Канюков Иван Иванович (*1956 годся июнь 19 лунö) – перем коми кипода морт, Перем крайлöн мастер.

Канюков Иван Иванович

Олантуй

Чужи ме 1956 годся июнь 19 лунö Белоево посадiсь чужтiсян керкуын (роддомын), кöда сы коста вöлi районнöй центрöн Молотовскöй областьын (öнi Пермскöй край). Нимсö сетöмась миян посадын почитайтан святöй Иван Тобольский честьö.

Видза тöдвылам ачымöс кык годсяöн, сулала ясельнöй кроваткаын, бура вежöрта ас гöгöрöс. Одз челядь кадiсь видзсьö тöдвылын случай, кöр ме орсi керкуным дынiсь песокын, кытöн мамö керис пытшкся ремонт. Менам челядёк юр вылö чеччöвтiс ыджыт петух. Повзьöмсянь да, натьтö, кокалöмсянь ранаэз увья вöлiсö горöтлöм, синваэз да вир… Эшö тöдвылам сiя, кыдз менö пыртiсö вичкуын, и ме кутчиси батюшкоыс тош бердö…

Челядь кадö шогмывлiсö уна серöмсора случайез. Усьö тöдвылö, кыдз мийö ёртöкöт етшасим витöт класс понда история сьöртi учебникись картинка понда. Сы вылын вöлi рисуйтöм македонскöй фаланга. Ме шуи, что фалангаыс быдöнныся вынажык, а менам ёртö лыддис вынажыкöн Сталинöс. Думайта, что эта вöлi эстетствосö медодззаись мыччалöм, а народдэзлöн вождь дынö ме и öнi относитча умöля.

Медтöдчана (шöр) кылöн, кöда вылын баитi не дзир ме, но баитiсö и мöдiк национальностя челядь, вöлi коми-пермяцкöй, роч кылыс пырис миян оланö жагвыв да гармоничнöя (нач мöднёж öння луннэзö, кöр челядь садсянь челядь баитöны дзир рочöн и нач озö баитö бы мам кыв вылын, мый öддьöн умöль). Эшö видзсьö тöдвылын учёнöйезкöт история, кöдна локтiсö Белоевоö машина-фургон вылын, и сiя сулалiс неылын миян керку дынсянь. Натьтö, эта вöлi этнографическöй экспедиция. Нiя баитiсö миянкöт, а öтiк ны коласiсь рисуйтiс миянлiсь портреттэз. Вöлi диво, что сiя не только точнöя мыччалiс менам чужöмлiсь пассэз, но и нельки меным чужан лун кежö козьналöм йöрнöсö вылiсь серпассэз.

Мийö уна кад чулöтлiм вöрын, видззез вылын, юэз да пруддэз дорын. Ме эшö школаын велöтчöм вотöдз велалi уявны, и купайтчöмыс вöлi медрадейтана «уджöн». Кадыс вöлi не öддьöн тырдоза, сiйöн «кок увтiсь вердчан» вöлi сёянын медтöдчана пайöн. Медöддьöн гленитчис раккезöс куталöм да нiйö сёйöм. Мамö сетiс менö школаын велöтчöм понда «роч» классö, медбы буржыка тöдны кывсö. Классас вöлiсö кык нето куим, айныс да мамныс сьöртi, роч велöтчись, быдöс мöддэс – коми-пермяккез. Медодзза классас ме мунi военизированнöй формаын, кöда вачкисис революция вотöдзся гимназисттэзлöн форма вылö, ременьöн да фуражкаöн. Велöтчи ме бура, медодзза классянь кватьöтöдз вöлi отличникöн.

Эта кадö миян олiс пон-лайка, шуисö Бобикöн, дойдöм одзись лапаа, но öддьöн лöг. Менö диво кутлiс, что сiя пыр медодззаöн уськöтчывлiс ассяас ыджытжык поннэз вылö, а пурсьöм бöрас пыр котöртлiс одзлань, бöжсö кытшöн видзикö, бытьтö нем эз и вöв. Умöль привычкаэзöн деревняись зонкаоккез коласын вöлiсö куритöм (медöддьöн гожумöн), азартнöй орсаннэз да аскерöм оружие (быдкодь пугаччез, «öзтаннэз», самостреллэз-лыйсяннэз да мöдiккез), поди, казьмöтлiс ас йывсис неважын чулалöм война.

Мöдöдз классянь ме велалi уна лыддьöтны, да сэтöн жö «кыз» книгаэз, сэтшöмöсь, кыдз А.Фадеевлöн «Молодая гвардия». Сэк жö пондi öктыны ассим библиотечка, кöда вылö видзсьывлiс быдöс карманнöй сьöм. Витöт классянь уна занимайтчи спортлöн быдкодь виддэзöн: баскетболöн, лёгкöй атлетикаöн (котрасьöм да чеччалöм), босьтлi мöдöдз места пионерскöй четырёхборье сьöртi.

Тöдчана успеххез рисуйтöм сьöртi эг мыччавлы. Но кватьöт классын рисованнё урок вылын тшöктiсö рисуйтны ассиным кикар (кисть руки). Серпасыс петiс öддьöн бур, нельки менö ачымöс кутiс диво. Кыкьямысöт классын рисуйтi велöтiсьлiсь портрет, мый понда тожö ошкисö.

Эта кадö желаннёэс вежсьывлiсö быд лунö: мöдi лоны то морякöн, то музыкантöн. Быдöс лöсьöтiс случай. Ордчöн классын велöтчись менам ёрт, кöда книжнöй лотереяöн «кыйис» книга «Наброски и зарисовки» (авторыс А. Барщ). Ме кори сетлыны сiйö меным, мый вылö сiя согласитчис.

Эта лунсянь ме пондi копируйтны мастеррезлiсь рисуноккез, керны ассим зарисовкаэз, а сiдз жö керны сёйись портреттэз да памятниккезлiсь копияэз ( пондi тöдмавны изобразительнöй искусстволiсь ыджыт арсенал). Менам олан туйö лоис вежöртана. Ыджыт аттьö мамöлö, Галина Изосимовналö, что эта коста сiя менö вежöртiс-видзис, тшöктiс столярлö лöсьöтны стационарнöй мольберт, кöдö ме öнöдз видза.

Рисованнё сьöртi сэкся велöтiсь Игнатий Семёнович туйдöтiс велöтчыны Нижнетагильскöй педагогическöй институтлöн художественно-графическöй факультет вылö. Медодззаись ме эг поступит, эз тырмö академическöй знаннёэз. Сэк ме пондi уджавны Пермскöй моторостростроительнöй заводын токарьöн-операторöн программнöй управленнёа станок вылын. Вöлi нельки одзын мунiсьöн, шедтi бур сьöм, кöда вылö букинистическöй магазиннэзын неблi искусство сьöртi книгаэз. Мöдiк годö сетi экзаменнэз да поступитi Нижнетагильскöй пединститутö «худграф» (кыдз ми сiйö шувлiм) факультет вылö, кöдö помалi 1979 годö.

Миян родыс тöдса Белоевоын да и округын быдкодь сфераэзын асланыс представителлезöн. Прабабö, Марфа Лукинична, вöлi туруннэз тöдiсьöн, томувьяс занимайтчис гончарствоöн. Öнöдз пöрись отир шувлöны меным: «Иван Иванович, кытшöм бур вöвлi тiян бабныт, нуöтлiс миянöс, челядёккесö, вöрö, мыччавлiс быдкодь туруннэз, висьтасис, кытшöм шогöттэз нiя бурсьöтöны. Долыт кывны сэтшöмсö морт йылiсь, кöда кулiс куим годöн одзжык менам чужöм вотöдз. Сылöн зон, Пётр, лоис генералöн, вöлi Советскöй Армиялöн генеральнöй штабын отделöн веськöтлiсьöн. Внучка, Нина Петровнв Канюкова (Баяндина), М. Горький нима Коми-Пермяцкöй драматическöй театрлöн актриса, лоис РСФСР-лöн заслуженнöй артисткаöн. Внук, Виталий Изосимович Канюков – уналö тöдса журналист, коми-пермяцкöй гижись.

Мавра Лукинична быдтiс и менчим мамöс, Галина Изосимовнаöс, сiйöн сы йылiсь касьтывлöммес матынöсь да донаöсь ме понда. Поди, и сетсис меным сылöн природнöй материаллэз дынö, сёй дынö да быдöс творчество дынö радейтöмыс.

Чулалö ни мöдiк век Канюковвез семьяын гончарнöй дело сьöртi. Ассим челядьöс воспитывайтiкö (а нiя менам куима), ме туйдöтчи принципöн – сетны семьялiсь традицияэз аслам челядьлö.

Поди, сiйöн пöрисьжык Галина-нылö да Иван-зонö мунiсö менам коктуйöт и одзлань нуöтöны гончаррезлiсь династия. Галина велöтчис Нижнетагильскöй социально-педагогическöй академияын (сiдз жö художественно-графическöй факультет вылын) да уджалö Нижньöй Тагилын педагогöн, занимайтчö декоративно-прикдаднöй творчествоöн.

Зонö, Канюков Иван Иванович (томжык), сiдз жö велöтчис педагогö, уджалö роднöй селоись школаын, нуöтö сёйись керöм фигураэз сьöртi кружок Кудымкарись Коми-Пермяцкöй этнокультурнöй центрын да Белоевскöй школаись «Семицветик» студияын. Пöрисьжык челядьö неöтпырись вöвлiсö призёррезöн, быдкодь конкурссэзын да фестиваллезын дипломанттэзöн. Томжык ныв Лиза кытчöдз кошшö ассис туй, 2019 годö помалас шöрöт школа. Но öнi ни сiя декоративно-прикладнöй творчество сьöртi международнöй, всероссийскöй да краевöй выставкаэзын участник да вермись-победитель.

Кыдз висьталiс менам пöрисьжык нылö: «Миян эз вöв мöдiк бöрйöм, кыдз мунны айö коктуй вылöт да тöдны керамика сьöртi важ искусствосö». Поди, сiя и висьталiс истина.

Менам керку-мастерскöйö – Белоевоын, ыбöссэс пыр осьтаöсь гöссез понда, ны понда, кин уджалыштö бы гончарнöй кытш сайын, кылö бы шонытсö да сёйлiсь дуксö, кöдалöн, кыдз и уна год сьöрна бöрлань, дукыс ас керкулöн, туруннэзлöн да роднöй мулöн.

Званнёэз да наградаэз

Почётнöй званнёэз

1. «Отличник народного просвещения РФ», 1994 г.
2. Коми-Пермяцкöй автономнöй округын Администрациялöн Почётнöй грамота, 2006 г.
3. «Народный мастер Пермского края», 2008 г.
4. Почётнöй пас «Отличник качества», 2009 г.
5. Пермскöй крайись губернаторлöн Благодарственнöй гижöт, 2016 г.

Наградаэз

Наградаэз, кöднö мастер получитiс всероссийскöй фестиваллез коста, конкурссэзын, выставкаэзын 2012 – 2017 годдэзö:

1. Мирын кореннöй народдэзлöн ремеслоэз сьöртi VII Международнöй фестивальын «Югра – 2012» вермисьлöн Диплом, г. Ханты-Мансийск.
2. Ас киэзöн керöм öння орсаннэзлöн VI Всероссийскöй фестивальын участниклöн Диплом. 2012 г., г. Москва.
3. Гончаррезлöн V Международнöй фестивальлöн «Скопин – 2013» номинацияын «Сохранение и развитие региональных традиций» вермисьлöн Диплом.
4. Россияись народдэзлöн художественнöй промыселлэз сьöртi ХV Выставка-ярмаркаын «Ладья. Зимняя сказка – 2013» участвуйтöм понда Диплом, г. Москва.
5. Народнöй творчество сьöртi Всероссийскöй фестиваль «Вместе мы – Россия» региональнöй этапын лауреатлöн Диплом, 2013 г., г. Чебоксары.
6. Народнöй творчество да ремеслоэз сьöртi «Краски народов мира» ХХV Международнöй фестивальын да «Берега «Надежды» международнöй проект рамкаэз пытшкын патриотическöй творчество сьöртi фестиваль-конкурслöн номинацияын «Декоративно-прикладное искусство (индивидуальное) I степеня лауреатлöн Диплом, 2013 г., Екатеринбург.
7. Мирись кореннöй народдэзлöн ремеслоэз сьöртi VIII Международнöй фестивальын «Югра – 2014» вермисьлöн Диплом, г. Сургут – Сургутскöй район – г. Нижневартовск.
8. Россияись народнöй художественнöй промыселлэз сьöртi ХVII Выставка-ярмаркаись «Ладья. Зимняя сказка – 2014» конкурснöй программалöн «Медведь в произведениях мастеров и художников народных промыслов» номинацияын III места понда Диплом, г. Москва.
9. Гончаррезлöн Кватьöт международнöй фестивались «Скопин – 2016» номинацияын «За верность ремеслу и сохранение локальных традиций» вермисьлöн Диплом.
10. Конкурс «Прикамье мастеровое» – 2016, I места (г. Пермь).
11. Конкурс «Прикамье мастеровое» – 2017, I место (г. Пермь).

Ӧшмӧссэз

• Искусство керамики. Народный мастер Пермского края Иван Канюков: альбом-каталог. Кудымкар, 2018. – 120 с. ISBN 978-5-6040950-6-5
• Канюков Иван Иванович
• Керамист Иван Канюков из Белоево стал обладателем спецприза Строгановской премии
• Иван Иванович Канюков - биография