Грезд (роч. деревня) — учöт олан пункт, кытöн абуöсь индустрия уджаиннэз, а отирыс уджалöны му, быдтöны пода, öктісьöны нето керöны кытшöмкö промысёл. Грездын йöзыс пыржык олöны асланыс торья керкуэзын.

Грезд
Грезд

Грезд кыв йылісь вильмӧтны

Талун Коми кытшын грезд кывсö лёка вунöтöмась ни. Быдлаын комиöн баитікö шуöны деревня. Кöть эшö XIX век пондöтчикö Кудымкарись поп Г.Чечулин аслас лексиконын гижö: деревняыс пö лоас комиöн грезд, кöть и содтö, шоча пö ни пантасьö асланым шуаныс.

Миян кадö грезд кыв тöдöны коми отир Язьваланьын да Коми Республикаын. Зырянаыс, комиöн сёрнитікö, деревнятö некор оз и горöтчö, сё грезд да грезд, мыля важся коми кыв кольччöма нылöн ловья. Сійöн и миян коми гижöтын, перем коми лыддьöтан кылын, вöзъям этійö шуансö ловзьöтны.

Грезд да посад вильмӧтны

Функцияэз сьöрті грездыс öддьöн вачкисьö посад вылö. Одзжык неöткодьыс грезд да посад коласын вöлі то мыйын: посадас эм вичку, а грездын абу. Öні эта тöдчаныс абу вына, мыля уна посаддэзын вичкуэз абуöсь, а мукöд грездын, мöдöрö, эмöсь.

Сё жö унажыксö посад овлö грездся ыджытжык, мыля вичкуа оланінö одзжык лöсьöтлöмась быдöс ордча грезддэз понда шöрин, отирыс сэтчин, туйö вежöртны, содöма чожажык.

Коми грезддэз вильмӧтны

Коми кытшын грезддэс — медтшöка пантасян оланін форма. Нія миян 590-а. Но нылöн лыдыс пыр чинö. Отирыс мунöны ыджытжык оланіннэзö кошшыны сьöмажык удж да кокнитжык олан. Роч юраліссез, мед тырмöтны казнаись сьöм, йöзтöмтöны учöт грезддэсö ныись школаэз да культура керкуэз пöдналöмöн. Коми грездыс öшö. Коми отир, кöдна мунöны карö нето посёлокö, рочсялöны.

Грезддэзлöн ниммез вильмӧтны

Коми отир шуöны оланіннэзнысö быдкодя, мыля комиэзкöт ордчöн пыр олöмась мöдік чужанвужа отир.

Медуна грезддэз нимтöмась морт ним сьöрті. Этö вермас лоны важ перем ним - Пыстöг, кистосалöн ним - Митя. Роч кылісь одзöстöмöсь тодильнöй содтассэз: -ов (-öв), -ова (-öва), -овчи, ин, ина, кöдна отсöтöн аркмöны грезд ниммез морт ниммезісь: Ёгоров, Бажöв, Закаровчи, Девин, Москвина.

Мукöд грезддэз нимтöмась увтыр ним сьöрті, шуам Модзга.

Места сьöрті нимтöмась: Сюзьпозъя, Пармайыл.

Öшмöссэз вильмӧтны

  • Аксёнова О.П. Коми-пермяцкие географические термины и их функционирование в топонимии Верхнего Прикамья. Кудымкар, 2009. ISBN 978-5-904524-35-7
  • Кривощёкова-Гантман А. С. Откуда эти названия?. Пермь, 1973
  • Кривощёкова-Гантман А. С. Географические названия Верхнего Прикамья. Пермь, 1983
  • Кривощёкова-Гантман А. С. Собрание сочинений в 2 тт. Пермь, 2006

Шаблон:Быдкодь оланіннэз

Оланіннэз